पुणे, ता. 14 : पुण्यातील पौड घाट परिसरात शनिवारी (दि. १३) सकाळी अकरा वाजण्याच्या सुमारास एका विवस्त्र तरुणाने भररस्त्यात गोंधळ घालत नागरिकांची आणि वाहनचालकांची चांगलीच तारांबळ उडवली. या प्रकारामुळे काही काळ वाहतूक विस्कळीत झाली असून परिसरात खळबळ उडाली.
मिळालेल्या माहितीनुसार, ३५ ते ४० वर्षे वयोगटातील एक तरुण विवस्त्र अवस्थेत पौड घाटातील मुख्य रस्त्यावर फिरताना दिसला. वाहनांची मोठी वर्दळ असताना तो अचानक रस्त्याच्या मधोमध उभा राहत वाहनांना अडवण्याचा प्रयत्न करू लागला. त्यामुळे काही काळ वाहतुकीचा वेग मंदावला आणि वाहनांच्या रांगा लागल्या.
घटनेची माहिती मिळताच स्थानिक ग्रामस्थ घटनास्थळी दाखल झाले. त्यांनी संबंधित तरुणाला शांत करण्याचा आणि ताब्यात घेण्याचा प्रयत्न केला. मात्र तो कोणाचेही ऐकण्याच्या मनःस्थितीत नसल्याने ग्रामस्थांच्या तावडीतून सुटून सैरावैरा धावू लागला. याच दरम्यान त्याने रस्त्यावरून जाणाऱ्या एका कारवर चढून धिंगाणा घातला. कारच्या छतावर उड्या मारल्याने वाहनाचे सनरूफ फुटून नुकसान झाले.
अखेर नागरिकांनी पुन्हा प्रयत्न करून त्या तरुणाला ताब्यात घेतले, त्याला कपडे घातले आणि पौड पोलिसांच्या स्वाधीन केले. संबंधित तरुणाची ओळख, त्याची मानसिक स्थिती तसेच तो विवस्त्र अवस्थेत का फिरत होता, याबाबत पोलीस अधिक तपास करत आहेत. या अनपेक्षित प्रकारामुळे पौड घाट परिसरात काही काळ गोंधळाचे वातावरण निर्माण झाले होते.
