पुणे: पुण्यातील खराडी परिसरात एका 28 वर्षीय तरुणाची अत्यंत क्रूरपणे हत्या झाल्याची धक्कादायक घटना उघडकीस आली आहे. या घटनेमुळे परिसरात भीतीचे वातावरण निर्माण झाले असून पोलिसांसमोर आरोपीचा शोध घेण्याचे मोठे आव्हान उभे राहिले आहे. विशेष म्हणजे, ज्या ठिकाणी हा खून झाला त्या परिसरात सीसीटीव्ही कॅमेरे नसल्याने तपासात अडचणी निर्माण होत आहेत.
मृत तरुणाचे नाव नईस सौदागर (वय 28) असे असून तो मूळचा उत्तर प्रदेशातील कौशांबी जिल्ह्याचा रहिवासी होता. नईस हा खराडीतील फाउंटन रोड परिसरात सागर चव्हाण यांच्या जागेवर असलेल्या पंक्चर दुरुस्तीच्या दुकानात राहत होता.
पोलिसांनी दिलेल्या माहितीनुसार, 12 जूनच्या रात्री 10 वाजल्यापासून 13 जूनच्या सकाळी 10 वाजेपर्यंतच्या कालावधीत ही घटना घडली. खराडीतील पिंड पंजाब हॉटेलजवळील बोराटे यांच्या मोकळ्या जागेत अज्ञात व्यक्तीने नईसच्या डोक्यावर सिमेंटच्या विटेचा मोठा तुकडा मारून त्याची हत्या केली. हल्ल्यानंतर आरोपी घटनास्थळावरून फरार झाला.
सकाळी नईसचा मृतदेह आढळल्यानंतर परिसरात एकच खळबळ उडाली. या प्रकरणी मृताचा भाऊ सुलतान सौदागर (वय 20) याने खराडी पोलीस ठाण्यात फिर्याद दिली आहे. त्यानुसार अज्ञात व्यक्तीविरुद्ध खुनाचा गुन्हा दाखल करण्यात आला आहे.
घटनेची माहिती मिळताच पोलीस उपायुक्त प्रशांत अमृतकर, सहाय्यक पोलीस आयुक्त नूतन पवार, वरिष्ठ पोलीस निरीक्षक संजय चव्हाण आणि इतर वरिष्ठ अधिकारी घटनास्थळी पोहोचले. मात्र, परिसरात सीसीटीव्ही कॅमेरे नसल्यामुळे आरोपीपर्यंत पोहोचणे पोलिसांसाठी कठीण ठरत आहे.
या गंभीर गुन्ह्याचा तपास आता गुन्हे शाखेकडे वर्ग करण्यात आला असून पोलीस निरीक्षक चंद्रसेन पालकर यांच्या मार्गदर्शनाखाली आरोपीचा शोध घेण्यासाठी सखोल तपास सुरू आहे.
