Fursungi Ganja Trafficker Arrested फुरसुंगी, ता. १४ : पुणे शहर गुन्हे शाखेच्या अंमली पदार्थ विरोधी पथकाने काळेबोराटेनगर परिसरात धडक कारवाई करत ६०९.३४ ग्रॅम गांजासह एका युवकाला अटक केली. आरोपीकडून गांजा, मोबाईल आणि रोख रक्कम असा एकूण ४८ हजार १८७ रुपयांचा मुद्देमाल जप्त करण्यात आला. Fursungi Ganja Trafficker Arrested
राजेश राजेंद्र गुंजाळ (वय २७, रा. देशमुख पेट्रोल पंपाजवळ, भेकराईनगर, पुणे) असे अटक करण्यात आलेल्या आरोपीचे नाव आहे. पोलिसांनी दिलेल्या माहितीनुसार, गुन्हे शाखेच्या अंमली पदार्थ विरोधी पथक-२ चे सहायक पोलीस निरीक्षक नितीनकुमार नाईक यांच्या मार्गदर्शनाखाली पथक अवैध धंद्यांविरोधात पेट्रोलिंग करत होते. यावेळी फुरसुंगी पोलीस ठाण्याच्या हद्दीतील श्री संतसेना महाराज विठ्ठल-रुक्मिणी मंदिराच्या पाठीमागील खाणीजवळील मोकळ्या जागेत एक संशयित युवक काळ्या प्लास्टिकच्या पिशवीसह उभा असल्याचे पोलिसांना आढळले. Fursungi Ganja Trafficker Arrested
पोलिसांना पाहताच तो पळून जाण्याचा प्रयत्न करत असल्याने त्याला ताब्यात घेऊन चौकशी करण्यात आली. त्याचे नाव राजेश राजेंद्र गुंजाळ (वय २७, रा. देशमुख पेट्रोल पंपाजवळ, भेकराईनगर, पुणे) असे असल्याचे समोर आले. पंचांसमक्ष आणि एनडीपीएस कायद्यातील कलम ५० अन्वये आवश्यक प्रक्रिया पूर्ण करून त्याची झडती घेण्यात आली. त्याच्या ताब्यातील काळ्या प्लास्टिकच्या पिशवीतून उग्र वासाचा ६०९.३४ ग्रॅम वजनाचा गांजा आढळून आला. Fursungi Ganja Trafficker Arrested
दरम्यान, पोलिसांनी आरोपीकडून १६ हजार रुपये रोख रक्कम आणि विवो कंपनीचा मोबाईल जप्त करण्यात आला. पोलिसांच्या प्राथमिक चौकशीत ही रोख रक्कम गांजा विक्रीतून मिळाल्याचे आरोपीने सांगितल्याची नोंद आहे. जप्त करण्यात आलेल्या गांजाची किंमत १२ हजार १८७ रुपये असून मोबाईलची किंमत २० हजार रुपये असल्याचे पोलिसांनी सांगितले. संपूर्ण मुद्देमाल पंचांसमक्ष सीलबंद करण्यात आला. याप्रकरणी राजेश गुंजाळ याच्याविरुद्ध एनडीपीएस कायद्याच्या कलम ८(क) व २०(ब)(ii)(अ) अन्वये गुन्हा दाखल करण्यात आला असून पुढील तपास फुरसुंगी पोलीस ठाण्याचे पोलीस उपनिरीक्षक बापुसाहेब खंदारे करीत आहेत.
