गुजरात: रस्त्यावरील वाढत्या वाहतूक कोंडीमुळे प्रवाशांचा मोठा वेळ वाया जातो. मात्र, आता बडोदा आणि मुंद्रा दरम्यान प्रवास करणाऱ्यांसाठी वेगवान पर्याय उपलब्ध झाला आहे. या मार्गावर एअर टॅक्सी सेवा सुरू करण्यात आली असून, व्यावसायिक आणि नियमित प्रवाशांना त्याचा मोठा फायदा होण्याची शक्यता आहे.
बडोदा-मुंद्रा-बडोदा एअर टॅक्सी सेवा 28 ऑगस्टपासून अधिकृतपणे सुरू झाली आहे. या सेवेचा वापर करून प्रवाशांना रस्त्यावरील ट्रॅफिक टाळता येणार असून, मुंद्रा पोर्ट आणि औद्योगिक परिसरात पोहोचण्यासाठी लागणारा वेळही कमी होणार आहे. सध्या Fly Air Taxi या कंपनीकडून ही सेवा चालवली जात आहे.
बडोद्याहून मुंद्राला जाण्यासाठी दररोज 3 एअर टॅक्सी उपलब्ध आहेत. या फेऱ्या सकाळी 6.30, 6.55 आणि 7.20 वाजता आहेत. रविवारी याशिवाय सकाळी 7.45 वाजता अतिरिक्त सेवा उपलब्ध राहणार आहे.
मुंद्राहून बडोद्याला परतण्यासाठीही आठवड्याच्या दिवसानुसार वेळा निश्चित करण्यात आल्या आहेत. सोमवार ते गुरुवार या काळात संध्याकाळी 6.32 ते 7.22 दरम्यान सेवा उपलब्ध असेल. शुक्रवार आणि शनिवारी 6.21 ते 7.11 या वेळेत एअर टॅक्सीची सुविधा मिळणार आहे. रविवारी 4 फेऱ्यांचे नियोजन करण्यात आले आहे.
एअर टॅक्सीचे तिकीट दर सुरुवातीला 499 पासून आहेत. मात्र, मागणी वाढल्यास हे दर 3,400 पर्यंत जाऊ शकतात. त्यामुळे कमी दरात प्रवास करण्यासाठी आगाऊ बुकिंग करणे फायदेशीर ठरू शकते. प्रत्येक फेरीमध्ये मर्यादित जागा असल्याने प्रवाशांनी आधीच सीट बुक करण्याचे आवाहन करण्यात आले आहे. या सेवेमध्ये आरामदायक आसनव्यवस्था, प्रशिक्षित चालक आणि आवश्यक प्रवासी सुविधा देण्यात आल्या आहेत. चेक-इन प्रक्रियेसाठीही तुलनेने कमी वेळ लागतो, असा कंपनीचा दावा आहे.
