पिंपरी-चिंचवड: नाशिक येथील कुंभमेळा आयुक्त (PCMC News) म्हणून नियुक्त झालेले शेखर सिंह यांच्या पिंपरी चिंचवड महापालिकेतील कार्यकाळावर आता प्रश्नचिन्ह निर्माण झाले आहे. त्यांच्या आणि (Pune News) तत्कालीन अतिरिक्त आयुक्त प्रदीप जांभळे पाटील यांच्या कामकाजातील घेतलेल्या कर्ज प्रकरणाची चौकशी करण्याचे आदेश राज्य शासनाच्या नगर विकास विभागाने दिले आहेत. यासाठी महापालिकेच्या सामान्य प्रशासन विभागाला तात्काळ चौकशी अहवाल सादर करण्याचे निर्देश देण्यात आले आहेत. तसेच महापालिकेच्या कर्जाचा वस्तुनिष्ठ अहवालही मागवण्यात आला आहे.
शेखर सिंह यांची सध्या नाशिकमधील कुंभमेळा विभागात बदली झाली आहे, तर प्रदीप जांभळे पाटील यांची प्रतिनियुक्ती वित्त विभागाकडे करण्यात आली आहे. दोन्ही अधिकाऱ्यांची बदली झाल्यानंतरही त्यांच्या कार्यकाळातील प्रशासनिक निर्णयांवर चर्चा सुरू आहे. विशेषत: प्रशासकीय राजवटीच्या काळात घेतलेल्या कर्ज प्रक्रियेबाबत अनेक शंका उपस्थित झाल्या आहेत.
राज्य शासनाला या दोन्ही अधिकाऱ्यांविरोधात तक्रार प्राप्त झाली होती. या तक्रारीच्या अनुषंगाने नगर विकास विभागाने पालिकेकडून चौकशी अहवाल मागवला आहे. महापालिका प्रशासनाकडूनही संबंधित कागदपत्रे गोळा करण्याचे काम सुरू आहे. त्यामुळे शासनाकडून दोन्ही अधिकाऱ्यांच्या कार्यकाळाची सखोल चौकशी होण्याची शक्यता व्यक्त केली जात आहे.
सनय छत्रपती शासन पक्षाचे अध्यक्ष नामदेवराव जाधव यांनी या अधिकाऱ्यांविरोधात मुख्यमंत्री देवेंद्र फडणवीस यांच्याकडे तक्रार केली होती. त्यांनी मार्च 2022 पासून सुरू असलेल्या प्रशासकीय कालावधीत काही अधिकाऱ्यांनी महापालिकेचा गैरफायदा घेतल्याचा आरोप केला होता. त्यांनी महापालिकेच्या तिजोरीत मोठ्या प्रमाणावर आर्थिक गैरव्यवहार झाल्याचेही आरोप केले. वसई-विरार महापालिकेत ज्या प्रकारे तपास व कारवाई झाली, तशीच कारवाई पिंपरी चिंचवड महापालिकेतील संबंधित अधिकाऱ्यांवर करावी, अशी मागणी त्यांनी केली होती. या तक्रारीनंतर शासनाची कारवाई प्रक्रिया सुरू झाली असून आता चौकशीचा अहवाल आल्यानंतर पुढील निर्णय होणार आहे.
