पुणे: मुळशीत (Mulshi News) एका नियंत्रण सुटलेल्या भरधाव आयशर टेम्पोने समोर येईल त्या वाहनाला अक्षरशः उडवत पाच वाहनांचा चक्काचूर केला. काल दुपारच्या सुमारास मुळशी येथील रस्त्यावर नेहमीप्रमाणे वर्दळ होती. अचानक एक आयशर टेम्पो सुसाट वेगाने आला. चालकाचे वाहनावरील नियंत्रण सुटल्याने या टेम्पोने एका रिक्षेला, कारला आणि दोन दुचाकींना जोरदार धडक दिली.
टेम्पो इतक्या वेगात होता की, एका दुचाकीस्वाराला सावरण्याची संधीही मिळाली नाही. दुर्दैवाने, टेम्पोचे चाक तरुणाच्या पायावरून गेले. तो तरुण रस्त्यावरच वेदनेने तडफडत होता.
सुदैवाने, या अपघातात कोणतीही जीवितहानी झाली नाही, परंतु एका तरुणाचा पाय गंभीर जखमी झाला असून इतर ४ ते ५ जण जखमी झाले आहेत. धडक बसलेल्या सर्व वाहनांचे मोठे नुकसान झाले आहे.
पुणे आणि आसपासच्या ग्रामीण भागात अवजड वाहनांची वर्दळ प्रचंड वाढली आहे. इथे वाहनांची गर्दी असते. मात्र, अरुंद रस्ते आणि त्यात चालकांचा बेदरकारपणा यामुळे सामान्य नागरिकांचे प्राण धोक्यात आले आहेत. दरम्यान, अशा घटना भविष्यात घडू नये म्हणून काय उपाय योजना केल्या जातात याकडे सर्वांचे लक्ष लागेल आहे.
