पिंपरी-चिंचवड: पिंपरी-चिंचवड शहरात गणपती बाप्पाच्या आगमनामुळे उत्साहाचे वातावरण निर्माण झाले आहे. अनेक मंडळांकडून दीड दिवस, 5 दिवस आणि 11 दिवस गणेशमूर्तींची स्थापना केली जाते. त्यामुळे आगामी गणेश विसर्जन मिरवणुकांच्या काळात शहरातील प्रमुख रस्त्यांवर मोठी गर्दी होण्याची शक्यता आहे. वाहतूक सुरळीत ठेवण्यासाठी पिंपरी-चिंचवड वाहतूक शाखेने काही मार्गांमध्ये तात्पुरते बदल केले आहेत.
या संदर्भात वाहतूक शाखेचे पोलिस उपायुक्त विक्रांत देशमुख यांनी शनिवारी आदेश जारी केला. मिरवणुका व्यवस्थित पार पडाव्यात आणि नागरिकांना वाहतूक कोंडीचा त्रास कमी व्हावा, यासाठी काही अंतर्गत रस्ते ठराविक काळासाठी बंद करण्यात येणार आहेत. या ठिकाणी वाहनचालकांना पर्यायी मार्गांचा वापर करावा लागणार आहे.
भोसरी पुलाखालून 14 ते 25 सप्टेंबरदरम्यान ठराविक वेळेत पीएमपीएमएल बसची वाहतूक बंद राहणार आहे. या बस पांजरपोळ किंवा मॅग्झीन चौकातून वळवण्यात येतील. तसेच खडकीकडून फुगेवाडीकडे जाणाऱ्या वाहनांसाठी ग्रेड सेपरेटरचा मार्ग उपलब्ध करून देण्यात येणार आहे. चिखली परिसरात आळंदी रस्त्यावरील वाहतूक भारतमाता चौकाच्या दिशेने वळवली जाणार आहे.
तळेगावमध्ये 20 सप्टेंबरला तळेगाव ते एच.पी. चौक मार्गावर अवजड वाहनांना प्रवेश बंद असेल. या वाहनांना वडगाव फाटा, नवलाख उंब्रे आणि चाकणमार्गे पुढे जाता येईल. मारुती मंदिर चौक तसेच डोळसनाथ मंदिर परिसरातील काही रस्त्यांवरही वाहतूक निर्बंध असतील.
सांगवी परिसरात 20 सप्टेंबरला माहेश्वरी चौक, जुनी सांगवी रस्ता, क्रांती चौक आणि फेमस चौक परिसरात खासगी वाहनांना प्रवेश दिला जाणार नाही. औंधच्या दिशेने जाणाऱ्या वाहनचालकांनी काटेपुरम आणि मयूरनगरी मार्गाचा वापर करावा.
वाकडमध्ये 23 ते 25 सप्टेंबरदरम्यान दत्त मंदिर रस्त्यावरील वाहतूक कावेरीनगर आणि कस्पटे कॉर्नरच्या दिशेने वळवली जाईल. तर निगडी-चिंचवड भागात 25 सप्टेंबरला अहिंसा चौक ते चापेकर चौक, दळवीनगर पूल तसेच भोई आळीहून चापेकर चौकाकडे जाणारे काही मार्ग बंद ठेवण्यात येणार आहेत.
नागरिकांनी या कालावधीत प्रवासाचे नियोजन करताना वाहतूक पोलिसांच्या सूचनांचे पालन करावे. शक्य असल्यास पर्यायी मार्गांचा वापर करून गर्दीच्या रस्त्यांवरील प्रवास टाळावा.
