पुणे, ता. २० : पुणे महापालिकेच्या बांधकाम विकास विभागाकडून फर्ग्युसन रस्त्यावरील दोन हॉटेल्सवर कारवाई करण्यात आली. यामध्ये हॉटेल वैशाली आणि क्वीन्स शॉप स्टोरी या हॉटेल्सवर ही कारवाई झाली. या कारवाईत एकूण 3500 चौरस फुटांचे अनधिकृत बांधकाम पाडण्यात आले. महापालिकेने अनधिकृत शेड काढून टाकत कारवाई केली.
शिवाजीनगर भागातील फर्ग्युसन रस्त्यावर हॉटेल वैशाली आणि क्वीन्स शॉप स्टोरी ही दोन प्रसिद्ध हॉटेल्स आहेत. यातील वैशाली हॉटेलमधील टेरेस आणि सामासिक अंतरातील सर्व विनापरवाना शेड्स हटविण्यात आल्या. यावेळी पक्के उभारलेले शेड गॅस कटरच्या साहाय्याने कापण्यात आले. बांबू आणि पत्र्यांच्या साहाय्याने बांधलेल्या शेडचा यामध्ये समावेश आहे.
…तर गुन्हा दाखल करणार..
ही कारवाई कार्यकारी अभियंता बिपीन शिंदे यांच्या मार्गदर्शनाखाली उपअभियंता सुनील कदम, शाखा अभियंता राहुल रसाळे, कनिष्ठ अभियंता समीर गढई यांनी केली. या हॉटेलकडून पुन्हा शेड उभारण्यात आली तर गुन्हा दाखल करण्यात येईल, अशी माहिती सुनील कदम यांनी दिली.
पोलिस बंदोबस्तामध्ये कारवाई..
या दोन हॉटेल्सवर महापालिकेच्या बांधकाम विकास विभागाकडून कारवाई करण्यात आली आहे. यावेळी मोठा पोलिस बंदोबस्त तैनात होता. घरपाडी विभागाकडील दहा बिगारी, एक पोलीस गट या कारवाईत सहभागी झाला होता.
