पिंपरी : हिंजवडी परिसरातील एका स्पा सेंटरमध्ये सुरू असलेल्या कथित वेश्याव्यवसायावर पिंपरी-चिंचवड पोलिसांच्या अनैतिक मानवी वाहतूक प्रतिबंधक विभागाने कारवाई करत दोन महिलांची सुटका केली आहे. या प्रकरणी स्पा सेंटरच्या व्यवस्थापकाला अटक करण्यात आली असून चालकासह दोघांविरोधात गुन्हा दाखल करण्यात आला आहे.
भुजबळ वस्ती येथील ‘ब्ल्यू डायमंड रिलॅक्स स्पा सेंटर’मध्ये ही कारवाई करण्यात आली. या प्रकरणात स्पा चालक मारुती ज्ञानेश्वर मुरडे आणि व्यवस्थापक वैशाली संतोष चव्हाण यांच्याविरोधात हिंजवडी पोलीस ठाण्यात गुन्हा नोंदविण्यात आला आहे. यापैकी वैशाली चव्हाण हिला पोलिसांनी अटक केली आहे.
अनैतिक मानवी वाहतूक प्रतिबंधक विभागाचे पोलीस निरीक्षक नितीन गीते यांना संबंधित स्पा सेंटरमध्ये बेकायदेशीर स्वरूपाचे प्रकार सुरू असल्याची माहिती मिळाली होती. त्यानुसार पोलिसांनी गोपनीय चौकशी सुरू केली. प्राथमिक माहितीची खातरजमा करण्यासाठी डमी ग्राहक पाठविण्यात आला. त्यानंतर संशयित ठिकाणी छापा टाकण्यात आला.
कारवाईदरम्यान दोन महिलांची सुटका करण्यात आली. तसेच संबंधितांविरोधात अनैतिक मानवी वाहतूक प्रतिबंधक कायद्यानुसार गुन्हा दाखल करण्यात आला आहे. या प्रकरणाचा पुढील तपास सुरू आहे.
पोलिसांनी दिलेल्या माहितीनुसार, यावर्षी अनैतिक मानवी वाहतूक प्रतिबंधक विभागाने शहरातील विविध स्पा सेंटर आणि इतर ठिकाणी एकूण 16 छापेमारी कारवाया केल्या आहेत. या कारवायांमधून पिटा कायद्यान्वये गुन्हे दाखल करण्यात आले असून आतापर्यंत 38 जणांना अटक करण्यात आली आहे. तसेच 37 महिलांची सुटका करण्यात पोलिसांना यश आले आहे.
दरम्यान, नियमांचे उल्लंघन करणाऱ्या स्पा सेंटरविरोधातही कठोर भूमिका घेण्यात आली आहे. पिंपरी-चिंचवडचे पोलीस आयुक्त विनयकुमार चौबे यांनी यावर्षी चार स्पा सेंटरवर एक वर्षासाठी बंदी घालण्याची कारवाई केल्याची माहिती पोलिसांनी दिली.
ही कारवाई पोलीस उपायुक्त रोहिदास पवार आणि सहाय्यक पोलीस आयुक्त विशाल हिरे यांच्या मार्गदर्शनाखाली करण्यात आली.
