पुणे: आळंदीतील श्री ज्ञानेश्वर महाराज संस्थान मंदिरातून दानपेटीतील रोकड अपहाराचा (Pune Crime) धक्कादायक प्रकार समोर आला आहे. मंदिरातील सेवकानेच विश्वासाचा गैरफायदा घेत दानपेटीतील पैसे चोरल्याचा आरोप असून या प्रकरणामुळे भाविकांमध्ये संताप व्यक्त होत आहे. मंदिर प्रशासनाच्या सतर्कतेमुळे आणि सीसीटीव्ही तपासणीत हा प्रकार उघडकीस आला. (Latest Marathi News)
या प्रकरणात विशाल बाळू वारुळे (वय 33) याला पोलिसांनी अटक केली आहे. तो मंदिरात दानपेटीतून जमा झालेली रोकड मुख्य कॅशिअर रूममध्ये जमा करण्याचे काम पाहत होता. याच जबाबदारीचा गैरफायदा घेत त्याने पैशांची अफरातफर केल्याचा आरोप आहे.
मिळालेल्या माहितीनुसार, 12 मे, 13 मे आणि 16 मे 2026 रोजी सायंकाळच्या वेळेत नोटांची मोजणी सुरू असताना आरोपीने कर्मचाऱ्यांची नजर चुकवत दररोज 5 हजार रुपये असे एकूण 15 हजार रुपये बाजूला काढले. संशय येऊ नये म्हणून त्याने पैसे गोणीत लपवून कॅशिअर रूममध्ये नेल्याचे सांगितले जात आहे.
त्यानंतर योग्य संधी साधून ही रोकड कपाटामागे लपवून ठेवण्यात आली. पुढे फुलांचे हार आणि इतर साहित्य घेऊन बाहेर जात असल्याचा बहाणा करत आरोपीने ही रक्कम बाहेर नेल्याचा आरोप आहे.
मंदिर प्रशासनाच्या ऑडिटदरम्यान पैशांमध्ये तफावत आढळल्यानंतर हा प्रकार समोर आला. त्यानंतर संस्थान व्यवस्थापनाने आळंदी पोलिसांकडे तक्रार दाखल केली. पोलिसांनी गुन्हा नोंदवत आरोपीला अटक केली असून पुढील तपास सुरू आहे. आरोपीने यापूर्वीही अशा प्रकारे गैरव्यवहार केला आहे का, याचाही तपास केला जात आहे.
