यवत, (पुणे) : शेताचा सामाईक बांध नांगरण्यास विरोध केला म्हणून एका 54 वर्षीय शेतकऱ्याच्या अंगावर थेट ट्रॅक्टर चालवून त्याला जिवंत मारण्याचा प्रयत्न करण्यात आल्याची घटना घडली आहे. बोरीपार्धी (ता. दौंड) ग्रामपंचायत हद्दीतील जमीन गट नं ६/६ मध्ये बुधवारी (ता. 20) हि घटना घडली. (Yavat Crime News)
धनाजी मल्हारी नवसे वय 54, व्यवसय शेती रा. बोरीपार्धी, टेंगलेमळा ता. दौंड) असे मारहाण करण्यात आलेल्या शेतकऱ्याचे नाव आहे. तर विलास शंकर दिवेकर, व रविंद्र विलास दिवेकर (रा. दोघेही वरवंड ता दौंड) अशी गुन्हा दाखल करण्यात आलेल्या बाप लेकाची नावे आहेत. या घटनेत ट्रॅक्टरचे मोठे चाक पाठीवरून गेल्याने नवसे हे जखमी झाले असून, याप्रकरणी यवत पोलिसांनी बाप-लेकाविरुद्ध भारतीय न्याय संहितेनुसार ‘जीवे मारण्याचा प्रयत्न’ केल्याचा गंभीर गुन्हा दाखल केला आहे.
पोलिसांनी दिलेल्या माहितीनुसार, फिर्यादी धनाजी नवसे हे बुधवारी आपल्या शेतातील पिकांवर औषध फवारणी करण्यासाठी गेले होते. त्याच वेळी आरोपी विलास दिवेकर आणि त्याचा मुलगा विलास दिवेकर हे त्यांच्या सामाईक शेताचा बांध ट्रॅक्टरने नांगरत होते. धनाजी नवसे यांनी त्यांना “सामाईक बांध का नांगरत आहे?” असा जाब विचारला. याचा राग येऊन दोन्ही आरोपींनी नवसे यांना अश्लील शिवीगाळ करत लाथाबुक्क्यांनी बेदम मारहाण करण्यास सुरुवात केली.
मारहाण करूनही आरोपी पुन्हा जबरदस्तीने बांध नांगरू लागल्याने, नवसे हे विरोध करण्यासाठी सामाईक बांधावर जाऊन उभे राहिले. यावेळी आरोपी रविंद्र दिवेकर याने धनाजी नवसे यांचा जीव जाऊ शकतो हे पूर्णपणे माहीत असतानाही, त्यांच्या अंगावर थेट ट्रॅक्टर (क्र. MH 12 VB 4212) घातला ट्रॅक्टर थेट अंगावर आल्याने नवसे खाली कोसळले आणि ट्रॅक्टरचे मोठे जड चाक त्यांच्या पाठीवरून गेले. या भयंकर प्रकारात नवसे यांच्या पाठीला आणि शरीराला गंभीर दुखापत झाली असे फिर्यादीत म्हटले आहे.
यावेळी आरोपींनी “पुन्हा आमच्या नादाला लागला तर जिवंत सोडणार नाही,” अशी थेट जीवे मारण्याची धमकी देऊन दोन्ही आरोपी घटनास्थळावरून पसार झाले. जखमी नवसे यांना तात्काळ रुग्णालयात उपचारासाठी दाखल करण्यात आले आहे. याप्रकरणी धनाजी नवसे यांनी दिलेल्या तक्रारीवरून यवत पोलीस ठाण्यात दोघांविरुद्ध विविध कलमान्वये गुन्हा दाखल करण्यात आला असून गुन्ह्याचा पुढील तपास यवत पोलीस ठाण्याचे पोलीस उपनिरीक्षक वागज हे करत आहेत.
