पुणे: पत्नीच्या चारित्र्यावर (Pimpri-Chinchwad Crime) संशय घेत तिला मारहाण (Pune Crime) करून गंभीर जखमी करण्याची धक्कादायक घटना चिंचवड परिसरात घडली आहे. भांडण सोडवण्यासाठी आलेल्या सासू आणि मेहुण्यावरही आरोपी जावयाने चाकूने वार करत त्यांनाही गंभीर जखमी केले. पोलिसांनी तत्काळ कारवाई करत आरोपीला अटक केली असून पुढील तपास सुरू आहे.
पिंपरी पोलीस ठाण्यात पीडित महिलेच्या आईने फिर्याद दिली आहे. या फिर्यादीनुसार, पोलिसांनी २४ वर्षीय जावयाला अटक केली आहे. पोलिसांनी दिलेल्या माहितीनुसार, आरोपीने पत्नीच्या चारित्र्यावर संशय घेत तिच्यावर वारंवार दमदाटी आणि अत्याचार केले. या वादाचा कळस गाठत त्याने संतापाच्या भरात चाकू उचलला आणि पत्नीच्या गळ्यावर वार केले. तिला वाचवण्यासाठी आई आणि भाऊ घरात आले असता आरोपीने त्यांच्यावरदेखील चाकूने हल्ला केला. या दोघांनाही गंभीर जखमा झाल्या असून त्यांना उपचारासाठी रुग्णालयात दाखल करण्यात आले आहे.
दरम्यान, हे भांडण सुरू असताना परिसरातील रहिवाशांनी आरडाओरडा ऐकून घटनास्थळी धाव घेतली. मात्र, आरोपीने ‘मी या एरियाचा भाई आहे, कोणी मध्ये आले तर त्याला ठार मारीन’ अशी धमकी देत सर्वत्र दहशत निर्माण केली. काही वेळाने शेजाऱ्यांनी पोलिसांना माहिती दिली आणि पिंपरी पोलिसांनी तत्काळ घटनास्थळी पोहोचत आरोपीला ताब्यात घेतले.
या घटनेनंतर परिसरात एकच खळबळ उडाली आहे. चौकशीअंती असे समोर आले की, पती-पत्नीमध्ये गेल्या काही दिवसांपासून सतत वाद सुरू होते. आरोपीचा स्वभाव आक्रमक होता आणि तो वारंवार पत्नीवर संशय घेत असे. पोलिसांकडून आरोपीकडून गुन्ह्यात वापरलेला चाकू जप्त करण्यात आला असून, घटनेचा पुढील तपास सुरू आहे.
पिंपरी पोलिसांनी सांगितले की, ही घटना घरगुती वादातून उद्भवलेली असली तरी आरोपीच्या धमकीच्या स्वरुपामुळे परिसरात भीतीचे वातावरण निर्माण झाले होते. पोलिसांनी नागरिकांना संयम ठेवण्याचे आवाहन केले असून, पीडित महिला आणि तिच्या नातेवाईकांवर रुग्णालयात उपचार सुरू आहेत.
