पुणे : ट्रान्सपोर्ट युनियनने हिट अँड रन कायद्याविरोधात संप घोषित केला आहे. यामुळे राज्यात पुढील तीन दिवस पेट्रोल पंप बंद राहणार असल्याच्या अफवेने पेट्रोल भरण्यासाठी झुंबड उडाली होती. मात्र, या राज्यव्यापी संपामध्ये पुणे पेट्रोल डिझेल असोसिएशन सहभागी होणार नाही. पुण्यातील सर्व पेट्रोल पंप चालू राहणार आहेत, असा खुलासा पेट्रोल-डिझेल असोसिएशनने केला आहे. राज्यव्यापी संपामध्ये पुणे पेट्रोल डिझेल असोसिएशन सहभागी होणार नसल्याने पुणेकरांना दिलासा मिळाला आहे.
केंद्र सरकारने हिट अँड रन प्रकरणी नवा वाहन कायदा आणला आहे. अपघात करून पळून जाणाऱ्या वाहन चालकांना ७ लाख रुपयांचा दंड आणि शिक्षेची तरतूद करण्यात आली आहे. या कायद्याला ट्रान्सपोर्ट असोसिएशनने विरोध केला आहे. हा कायदा मागे घेण्यात यावा यासाठी राज्यव्यापी संप पुकारण्यात आला आहे. राज्यातील अनेक शहरांमध्ये संप पाळण्यात येत असून, वाहनचालक आक्रमक झाले होते. मात्र, या संपात पुणे पेट्रोल डिझेल असोसिएशनने सहभागी न होण्याचा निर्णय घेतला आहे. पुणे शहरासह पुणे जिल्ह्यातील सर्व पेट्रोल पंप सुरळीत चालू राहणार आहे. पेट्रोल डिझेल असोसिएशनच्या बैठकीत एकत्रितरित्या हा निर्णय घेण्यात आला आहे. ऑल इंडिया पेट्रोल डीलर्स असोसिएशनचे प्रवक्ते अली दारुवाला यांनी पुणे आणि पिंपरी चिंचवडमधील पेट्रोल पंप सुरु राहणार असल्याचे सांगितले आहे.
भारत पेट्रोलियम, हिंदुस्थान पेट्रेलियम, इंडियन ऑईल या इंधन कंपन्यांसह इंडियन गॅस बॉटलिंग प्रकल्पातील इंधन वाहतूक करणारे टँकर चालक सहभागी झाले आहेत. त्यामुळे राज्यात इंधन तुटवडा निर्माण होण्याची भीती आहे. त्यामुळे राज्यात अनेक ठिकाणी पेट्रोल पंपावर पेट्रोल, डिझेल भरण्यासाठी नागरिकांनी मोठी गर्दी केली होती.
राज्यात पेट्रोल तुटवडा होणार असल्याची चर्चा सुरू झाल्यानंतर सगळ्याच जिल्ह्यांमध्ये पेट्रोलपंपावर वाहनचालकांची गर्दी उसळली आहे. राज्यातील सर्व जिल्हाधिकारी, पोलीस आयुक्त आणि जिल्हा पोलीस अधीक्षकांना शासनाकडून पत्रक जारी करण्यात आले आहे. नागरिकांची गैरसोय होऊ नये यासाठी तत्काळ उपाययोजना करण्याचे निर्देश सरकारने दिले आहेत. याशिवाय तेल कंपन्यांना आवश्यक सहकार्य करा अशी सूचना देण्यात आली आहे. संपात सहभागी वाहतूकदारांकडून कुठलाही अनुचित प्रकार घडू नये, कायदा सुव्यवस्थेचा प्रश्न निर्माण होऊ नये यासाठी काळजी घेण्याच्या सूचना सरकारने प्रशासनाला दिल्या आहेत.
