पुणे : हडपसर परिसरातील कालव्यात दोन मृतदेह आढळले आहेत. वैदूवाडी भागातील रहिवाशांनी कालव्यात दोन मृतदेह तरंगत असल्याचे सोमवारी रात्री पाहिले. वाहून आलेल्या मृतदेहाची ओळख पटलेली नाही.
दरम्यान, नागरिकांनी या घटनेची माहिती पोलिसांना दिली. त्यानुसार हडपसर पोलीस ठाण्याचे पथक घटनास्थळी दाखल झाले. अग्निशामक दलाचे पथक देखील माहिती मिळताच तातडीने घटनास्थळी पोहोचले. अग्निशमन दलातील जवानांनी दोन्ही मृतदेह पाण्याबाहेर काढले. मात्र, दोन्ही मृतदेहांची नेमकी ओळख पटलेली नाही. वैद्यकीय तपासणीसाठी दोन्ही मृतदेह ससून रुग्णालयात पाठवण्यात आले आहेत.
शहरातून बेपत्ता असलेल्या व्यक्तींच्या नोंदीवरून पोलिसांनी तपास सुरू केला आहे. हडपसर पोलीस या प्रकरणाचा अधिक तपास करत आहेत.
