पिंपरी चिंचवड : पिंपरी-चिंचवड शहरातून जाणाऱ्या पुणे-बेंगलोर महामार्गावर एका भरधाव ट्रकने रस्ता ओलांडणाऱ्या पती-पत्नीला चिरडल्याची घटना घडली आहे. या अपघातात ४२ वर्षीय व्यक्तीचा जागीच मृत्यू झाला आहे. तर महिला गंभीर जखमी झाली असून तिला उपचारासाठी रुग्णालयात दाखल करण्यात आलं आहे. शरद वसंत गायकवाड (वय-४२) असं मृत व्यक्तीचं नाव आहे. ही घटना रविवारी (दि. ०७) रात्री १० वाजण्याच्या सुमारास घडली.
याबाबत मिळालेल्या माहितीनुसार, शरद वसंत गायकवाड हे रविवारी रात्री १० वाजेच्या सुमारास आपल्या पत्नीसोबत पिंपरी चिंचवड शहरातील शनि मंदिराकडून डिकेथलॉन मॉलकडे निघाले होते.
यावेळी रस्ता ओलांडताना समोरून येणाऱ्या भरधाव ट्रकने पती-पत्नीला जोरदार धडक दिली. या धडकेत पती-पत्नी हवेत उडाले. डोक्याला गंभीर दुखापत झाल्याने शरद यांचा जागीच मृत्यू झाला. तर त्यांच्या पत्नी गंभीर जखमी झाल्या आहेत.
या घटनेची माहिती मिळताच पोलीस घटनास्थळी दाखल झाले. शरद गायकवाड यांचा मृतदेह शवविच्छेदनासाठी रुग्णालयात पाठवण्यात आला आहे. त्यांच्या पत्नीला उपचारासाठी रुग्णालयात दाखल करण्यात आलं असून त्यांच्यावर उपचार सुरु आहेत. अपघातानंतर वाकड पोलिसांनी ट्रक ड्रायव्हरला ताब्यात घेतलं आहे. याप्रकरणी रात्री उशिरापर्यंत वाकड पोलिस ठाण्यात गुन्हा दाखल करण्याची काम सुरू होती.
