पुणे : कोरेगाव पार्क परिसरात पैसे पडल्याची बतावणी करुन बांधकाम व्यावसायिकाच्या मोटारीतून एक लाखाची रोकड चोरट्याने मंगळवारी (दि. २२) लांबवली. सीसीटीव्ही फुटेजच्या साहाय्याने पोलिसांनी तपास जारी केला आहे. यासंदर्भात बांधकाम व्यावसायिक नवनाथ काकडे (वय ४२, रा. थेऊर) यांनी कोरेगाव पार्क पोलीस ठाण्यात फिर्याद नोंदवली आहे. काकडे बांधकाम व्यावसायिक आहेत. ते मंगळवारी दुपारी ढोले पाटील रस्त्यावरील धर्मादाय आयुक्त कार्यालयात आले होते. काकडे कामानिमित्त या कार्यालयात गेले.
त्यांच्या मोटारीवरील चालक संजय जाधव याने मोटार या परिसरातील रेस्टॉरंटजवळ उभी केली होती. जाधव मोटारीत बसले असताना एक चोरटा मोबाईलवर बोलत तेथे आला. त्याने मोटारचालक जाधव यांच्याकडे पैसे पडल्याची बतावणी केली. जाधव पैसे उचलण्यासाठी मोटारीतून खाली उतरले. त्यांचे लक्ष नसल्याची संधी साधून चोरट्याच्या दोघा साथीदारांनी मोटीरातील सीटवर ठेवलेली एक लाख रुपयांची रोकड, कपडे, क्रेडीट कार्ड, डेबिट कार्ड, ओळखपत्र असा मुद्देमाल ठेवलेली पिशवी लांबवली.
