पुणे : शहरातील कोथरुडमध्ये (Nilesh Ghaywal) गेल्या महिन्यात झालेल्या गोळीबाराच्या (Pune Crime) घटनेनंतर कुख्यात घायवळ गँग पुन्हा (Pune News) एकदा चर्चेत आली आहे. या प्रकरणानंतर गुंड निलेश घायवळ याच्या मागे पोलिसांचा ससेमिरा लागला. मात्र, पोलिसांचे हात त्याच्यापर्यंत पोहोचण्याआधीच तो युरोपमध्ये फरार झाला आहे. विशेष म्हणजे, गुन्हे दाखल असतानाही निलेश घायवळला पासपोर्ट कसा मिळाला, हा गंभीर प्रश्न उपस्थित झाला आहे. पोलिसांच्या भूमिकेबाबत संशय व्यक्त केला जात आहे.
दरम्यान, पुणे पोलिसांनी निलेश घायवळच्या कोथरुड येथील घराची झाडाझडती घेतली. त्यावेळी पोलिसांनी 2 स्कॉर्पिओ आणि काही दुचाकी वाहने जप्त केली आहेत. दुसरीकडे, आता निलेश घायवळचा भाऊ सचिन घायवळ याच्या बंदूक परवान्यावरूनही वादंग निर्माण झाले आहे. त्याला बंदूक परवाना कसा मिळाला, असा प्रश्न उपस्थित होत असून राजकीय वर्तुळात यावरून तापलेल्या चर्चा सुरू आहेत.
निलेश आणि सचिन घायवळ हे मूळचे अहमदनगर जिल्ह्यातील जामखेड तालुक्यातील सोनेगाव येथील आहेत. हे गाव खर्ड्यापासून सुमारे 10 किमी अंतरावर आहे. सचिन घायवळ हा पुण्यातील एका शिक्षण संस्थेत क्रीडा शिक्षक म्हणून कार्यरत आहे. 2019 च्या विधानसभा निवडणुकीत तो रोहित पवारांच्या प्रचारात सक्रीय होता. 2019 ते 2024 या काळात घायवळ बंधू रोहित पवारांसोबत दिसत होते.
मात्र, स्थानिक ग्रामपंचायतींसह इतर राजकीय पदांवर घायवळ समर्थकांना स्थान मिळावे म्हणून सचिन घायवळ प्रयत्नशील होता. यावरून रोहित पवार आणि घायवळ बंधू यांच्यात मतभेद झाले असल्याची चर्चा जामखेड मतदारसंघात आहे. या मतभेदांनंतर 2024 मध्ये घायवळ बंधूंनी रोहित पवारांची साथ सोडून माजी मंत्री राम शिंदे यांच्यासोबत जाण्याचा निर्णय घेतला. विधानसभा निवडणुकीत त्यांनी राम शिंदेंच्या प्रचारात सहभाग घेतला होता. याचे पुरावे म्हणून काही व्हिडीओ देखील समोर आले आहेत.
सध्या पोलिसांकडून घायवळ गँगवर कारवाईचा बडगा उगारण्यात येत आहे. त्यामुळे घायवळ कुटुंबीय फरार झाल्याचे समजते. सोनेगाव येथीलही निलेश घायवळचे कुटुंबीय घर सोडून पसार झाले आहेत. त्याचवेळी, निलेश घायवळचा भाऊ सचिन घायवळ याच्यावर कोथरुड पोलिस ठाण्यात गुन्हा दाखल करण्यात आला आहे.
सचिन घायवळवर बांधकाम व्यावसायिकाकडून खंडणी मागितल्याचा आरोप आहे. त्यामुळे पुणे पोलिसांनी त्याच्याविरुद्ध गुन्हा दाखल करून तपास सुरू केला आहे. एका बाजूला निलेश घायवळ युरोपला पळून गेलेला असताना, दुसऱ्या बाजूला सचिन घायवळ खंडणी प्रकरणी अडचणीत सापडला आहे. यामुळे घायवळ गँगविरुद्ध पोलिसांचे कारवाईचे चक्र आणखी गतीमान होण्याची चिन्हे आहेत.
