लोणी काळभोर, (पुणे) : पुणे सोलापूर महामार्गावर लोणी काळभोर ग्रामपंचायतीच्या हद्दीत लग्न कार्याला निघालेल्या नवरदेवाच्या चारचाकी गाडीला एस. टी. बसने पाठीमागून जोरदार धडक दिल्याची धक्कादायक घटना नुकतीच घडली आहे. या अपघातात चारचाकी गाडीचे मोठे नुकसान झाले. मात्र, कोणतीही जीवितहानी झाली नाही. सोमवारी (ता. ४) सकाळी सव्वा दहा वाजण्याच्या सुमारास लोणी कॉर्नर या ठिकाणी ही घटना घडली.
याबाबत मिळालेल्या माहितीनुसार, लोणी काळभोर परिसरातून नवरदेवाची चारचाकी गाडी ही सोलापूरच्या दिशेने निघाली होती. या वेळी एस.टी बसने नवरदेवाच्या चारचाकी वाहनाला पाठीमागून जोरदार धडक दिली. या घटनेत चारचाकी गाडीतील एका महिलेच्या डोक्याला दुखापत झाली. अपघात पाहण्यासाठी बघ्यांनी मोठी गर्दी केली होती.
दरम्यान, या घटनेनंतर सोलापूरच्या दिशेने निघालेल्या वाहनांचा खोळंबा झाला असून, मोठी वाहतूक कोंडी झाली होती. अपघातानंतर लोणी काळभोर पोलीस घटनास्थळी दाखल झाले आहेत. पुढील कार्यवाही सुरु आहे.
