पुणे: देशासह महाराष्ट्रात सध्या लोकसभा निवडणुकीची रणधुमाळी जोरात सुरु झाली आहे. महाराष्ट्रात तर प्रचार टिपेला पोहोचला असून महायुती आणि महाविकास आघडीमध्ये जोरदार घमासान होत आहे. दोन्ही बाजूंचे नेते नेते एकमेकांवर एकमेकांवर तातून पडत आहेत. अशातच महाविकास आघाडीच्या नेत्या आणि बारामती लोकसभा मतदारसंघाच्या उमेदवार सुप्रिया सुळे यांनी आपल्या व्हॉट्सॲप स्टेटसच्या माध्यमातून विरोधकांना डिवचलं आहे. खासदार शरद पवार यांचा एक फोटो टाकून कितीही येऊ देत, पण आमचा एकटा बॉस नेता पुरेसा आहे, असं सुप्रिया सुळे यांनी म्हटलं आहे.
यंदाची लोकसभा निवडणूक ही महाराष्ट्राच्या दृष्टींनी अनेक अर्थांनी वेगळी आणि महत्वाची आहे. कारण लोकसभा निवडणुकीपूर्वी राज्यातील महत्वाचे पक्ष राष्ट्रवादी काँग्रेस आणि शिवसेना हे दोन पक्ष फुटले आहेत. त्यामुळे महत्वाचे नेते आणि कार्यकर्त्यांमध्ये दोन गट निर्माण झाले आहेत. या निवडणुकीत अनेक जागांवर तर राष्ट्रवादी काँग्रेस आणि शिवसेना या पक्षांमधील गटांतच थेट लढत होणार आहेत. प्रचारादरम्यान पूर्वी एकाच पक्षात असलेले नेते एकमेकांवर जहरी टीका करताना दिसत आहेत. यामध्ये खासदार शरद पवार यांच्या कन्या सुप्रिया सुळे यादेखील मागे नाहीत. त्यांनी शरद पवार यांचे दोन फोटो एकत्र करून विरोधकांना डिवचलं आहे. काहीही झालं तरी फक्त आमचे शरद पवार विरोधकांना पुरेसे आहेत, असं सुप्रिया सुळे यांनी आपल्या स्टेटसच्या माध्यमातून सांगितले आहे.
सुळे यांच्या स्टेटसमध्ये नेमकं काय आहे?
खासदार सु्प्रिया सुळे यांनी आपल्या व्हॉट्सॲप स्टेटसवर शरद पवार यांचे दोन फोटो एकत्र करून टाकले आहेत. यामध्ये राष्ट्रवादीच्या फुटीनंतर शरद पवार यांनी हात वर केलेला एक फोटो आहे. तर दुसऱ्या फोटो हा साताऱ्यात शरद पवार यांनी कॉलर उडवलेला आहे. पवारांच्या या दोन्ही फोटोंची चांगलीच चर्चा झाली होती या दोन फोटोंसोबत खासदार सुप्रिया सुळेंनी एक गाणे जोडले आहे. “किती बी येवू दे समोर, त्यांना एकटा बास” असे या गाण्याचे शब्द आहेत. विरोधकांनी आमच्यावर कितीही हल्ले केले, तरी शरद पवार सर्वांना पुरून उरतात, असं सुप्रिया सुळे यांनी आपल्या स्टेटसच्या माध्यमातून सुचवले आहे. सुळे यांच्या या स्टेटसची सध्या सर्वत्र जोरदार चर्चा आहे.
