आंबेगाव (पुणे) : मंत्री दिलीप वळसे पाटील बैलगाडा शर्यतीच घाट गाजवायला गेले; त्याचवेळी कार्यकर्त्यांनी शरद पवार यांच्या जयघोषाने घाट दणाणून सोडले. परिणामी दिलीप वळसे पाटील यांची बोलतीच बंद झाली. वळसे पाटील यांच्यावर भाषण आटोपते घेण्याची ‘वेळ’ आली. शरद पवारांच्या कार्यकर्त्यांनी अशा रीतीने वळसे पाटील यांची बारी फसवल्याची चर्चा राजकीय वर्तुळात रंगली होती.
वळसे पाटील त्यांच्या आंबेगाव विधानसभेच्या दौऱ्यावर होते. शिरूर तालुक्यातील पाबळ गावात ते पोहचले असता, गावात यात्रेनिमित्त बैलगाडा शर्यतीचे आयोजन करण्यात आले होते. त्या घाटात वळसे पाटील पोहचले. यावेळी त्यांनी बारी मारण्यासाठी माईक हाती घेतला. आगामी निवडणुका लक्षात घेता, वळसे पाटील यांनी पाण्याचा प्रश्न पालकमंत्री अजित पवार आणि उपमुख्यमंत्री देवेंद्र फडणवीस यांच्या पुढाकाराने सोडवू, असे आश्वासन दिले. मात्र, त्यावेळी काही कार्यकर्त्यांनी शरद पवारांचा विजय असो, अशा घोषणा देत घाट दणाणून सोडला.
दरम्यान, कार्यकर्त्यांचा बदललेला नूर पाहून वळसेंनी स्मित हास्य केले आणि म्हणाले, पवार साहेबांवर माझंही प्रेम आहे. गेली ४० वर्षे मी त्यांच्यासोबत होतो. मात्र, बदलेल्या परिस्थितीमुळे आज मी त्यांच्यासोबत नाही. यावर मी राजकीय व्यासपीठावरून नक्कीच बोलेन. सध्या शेती आणि पिण्याच्या पाण्याचा प्रश्न महत्वाचा आहे, तो सोडवण्यासाठी मी प्रयत्न करेन. यापुढे फार काही बोलत नाही, असे म्हणून वळसे पाटील यांच्यावर भाषण आटोपते घेण्याची ‘वेळ’ आली. या फसलेल्या बारीची चर्चा परिसरात रंगली होती.
दरम्यान, शरद पवार यांनी काही दिवसांपूर्वी आंबेगाव मतदारसंघात दौरा करताना मानसपुत्र दिलीप वळसेंना पराभूत करण्याचे आवाहन मतदारांना केले होते. या तालुक्यातील अनेकांनी माझ्यासोबत प्रामाणिकपणे काम केले आहे. ते सध्या हयात नाहीत. निष्ठा हे त्यांचे वैशिष्ट्य होते. पण आज आम्ही त्यांना सगळे दिले. विधानसभा, मंत्री, विधानसभा अध्यक्ष पद, साखर कारखान्याचे राष्ट्रीय अध्यक्ष पद दिले. मात्र, त्यांनी पाच टक्केही निष्ठा पाळली नाही. ते नागरिकांशी सुद्धा निष्ठा पाळणार नाहीत, त्यांना धडा शिकवण्याची आता वेळ आली आहे, अशी टीका शरद पवार यांनी केली होती.
