पुणे : ‘एमएचटी सीईटी’ (राज्य सामाईक प्रवेश परीक्षा)च्या पुन:परीक्षेचे प्रवेश पत्र (हॉल तिकीट) आजपासून (ता.२७) परीक्षा कक्षाच्या संकेतस्थळावर उपलब्ध होणार आहे . महाराष्ट्रातील विविध केंद्रांवर ही परीक्षा घेण्यात येणार आहे.
या परीक्षा राज्यातील विविध केंद्रांवर घेण्यात येणार असून त्याची हॉल तिकिटे आजपासून प्रवेश परीक्षा कक्षाच्या ‘www.mahacet.org’ या अधिकृत संकेतस्थळावर उपलब्ध करून देण्यात येतील, अशी माहिती परीक्षा कक्षामार्फत देण्यात आली आहे.
तंत्रशिक्षण विभागाअंतर्गत घेण्यात आलेल्या ‘एमएचटी सीईटी’ परीक्षेदरम्यान तांत्रिक अडचणींमुळे परीक्षा पूर्ण करू न शकलेल्या, तसेच अन्य कारणाने परीक्षा देऊ न शकलेल्या विद्यार्थ्यांची पुन:परीक्षा येत्या सोमवारी (ता.२९) होणार आहे.
सामाईक प्रवेश परीक्षा ५ ते २० ऑगस्ट या कालावधीत घेण्यात आल्या होत्या. परंतु परीक्षेदरम्यान सर्व्हर डाऊन होणे, तांत्रिक-अतांत्रिक अडचणी उद्‌भवल्यामुळे आणि राज्यात अनेक ठिकाणी अतिवृष्टी झाल्याने अनेक विद्यार्थी परीक्षा देऊ शकले नाहीत. अशा उमेदवारांना पुन:परीक्षा देता यावी, यासाठी नोंदणी करण्यासाठी तीन वेळा मुदत वाढ देण्यात आली होती.
