पुणे: महाराष्ट्रातील 32 जिल्हा परिषदा आणि 336 पंचायत समित्यांच्या आगामी निवडणुकीसाठी (Maharashtra Local Bodies Election) प्रारुप मतदार याद्या तयार (Maharashtra Voters List 2025) करण्याचे काम आता अंतिम टप्प्यात आहे. या प्रारुप मतदार याद्या येत्या बुधवारी (दि. 8 ऑक्टोबर) प्रसिद्ध करण्यात येणार आहेत. या मतदार याद्या गट आणि मतदान केंद्रानिहाय असतील. याद्या प्रसिद्ध झाल्यानंतर येत्या 14 ऑक्टोबरपर्यंत मतदारांमधील त्रुटींवर आक्षेप घेता येईल, तसेच संबंधित व्यक्तींना लेखी हरकती आणि सूचना नोंदवण्याची संधी मिळेल.
राज्य निवडणूक आयोगाने राज्यातील 32 जिल्हा परिषदा आणि 336 पंचायत समित्यांच्या सार्वत्रिक निवडणुकीसाठी दि. 1 जुलै 2025 पर्यंतची मतदारयादी ग्राह्य धरण्याचा निर्णय घेतला आहे. या निर्णयानुसार गट आणि मतदान केंद्रानिहाय प्रारुप मतदार याद्या तयार करण्याचे काम सुरू झाले असून, बुधवारी प्रारुप मतदार याद्यांवरील हरकती आणि सुचनांचे निराकरण केल्यानंतर, दि. 27 ऑक्टोबर रोजी अंतिम मतदार याद्या प्रकाशित केल्या जाणार आहेत, असे राज्य निवडणूक आयोगाने स्पष्ट केले आहे.
महाराष्ट्रातील 26 जिल्हा परिषदा आणि 286 पंचायत समित्यांचा कार्यकाल अनुक्रमे दि. 20 मार्च आणि दि. 13 मार्च 2022 रोजी संपला होता. त्यानंतर या सर्व पंचायतराज संस्थांवर प्रशासकराज लागू होता. याचबरोबर, आणखी सहा जिल्हा परिषदा आणि 50 पंचायत समित्यांचा कार्यकाल देखील संपुष्टात आला आहे. त्यामुळे सुमारे पावणे चार वर्षांच्या अंतरानंतर या निवडणुका घेण्याचे काम सुरु होत आहे.
राज्य निवडणूक आयोगाचे स्पष्टिकरण आहे की, प्रारुप मतदार याद्या प्रकाशित झाल्यानंतर नागरिकांनी त्रुटींबाबत तक्रार नोंदवता यावी आणि अंतिम मतदार याद्या तयार करताना या हरकतांचा विचार केला जाईल. याद्वारे आगामी जिल्हा परिषदा आणि पंचायत समित्यांच्या निवडणुकीत पारदर्शकता आणि सुव्यवस्था सुनिश्चित केली जाईल.
