लोणी काळभोर, (पुणे) : जालना येथे मराठा आंदोलकांवर पोलिसांनी केलेल्या लाठीमाराचा निषेध म्हणून मंगळवारी (ता. ०५) कदमवाकवस्ती, लोणी काळभोर हि गावे बंद ठेवण्यात येणार आहेत. याबाबतचे निवेदन सकल मराठा समाज लोणी काळभोर व कदमवाकवस्ती आयोजकांनी पोलिसांना दिले आहे.
जालना येथे मराठा आरक्षणाच्या मागणीसाठी अंतरवाली सराटी गावात उपोषण करणाऱ्या आंदोलकांवर पोलिसांनी अमानुष लाठीमार केला. यात अनेक आंदोलनकर्ते, महिला, युवक जखमी झाले. या अमानवी अत्याचाराविरोधात दोन्ही गावे मंगळवारी बंद ठेवण्यात येणार आहे.
दरम्यान, नागरिकांनी व परिसरातील व्यापाऱ्यांनी शांततेच्या मार्गाने या बंदमध्ये सहभागी व्हावे, असे आवाहन सकल मराठा समाजाच्या वतीने करण्यात आले आहे. याबाबतचे निवेदन लोणी काळभोर पोलिसांना देण्यात आले आहे.
