लोणी काळभोर, ता. 6: गॅरेजमध्ये दुरुस्तीसाठी आलेल्या दुचाकी गाड्या ढकलुन व्यावसायिकाला शिवीगाळ करून कोयत्याने मारण्याची धमकी दिल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील कवडीपाट टोलनाक्याजावर शुक्रवारी (ता.4) रात्री एक वाजण्याच्या सुमारास घडली आहे. या गुन्ह्यातील आरोपीला लोणी काळभोर पोलिसांनी त्वरित अटक केली आहे.
मारुती भगवान कोळेकर ( पांडव दंड रोड, फुरसुंगी पुणे,मुळ रा. येरले, पोस्ट वैराग, ता.बार्शी,सोलापूर) ) असे अटक करण्यात आलेल्या आरोपीचे नाव आहे. याप्रकरणी नवनाथ विठ्ठल काळभोर (वय ४८, रा. कदमवाकवस्ती, ता. हवेली, जि.पुणे) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी काळभोर यांचे कवडीपाट टोल नाक्याजवळ अंबिका अॅटोमोबाईल नावाचे गॅरेज आहे. फिर्यादी यांनी शुक्रवारी नेहमीप्रमाणे गॅरेज बंद करून थांबले होते. तेव्हा आरोपी मारुती कोळेकर हा हातात लोखंडी कोयता घेऊन तेथे आला. मी इथला भाई आहे असे म्हणून शिवीगाळ करत कोणी काय करतो ते बघतो असे म्हणून शिवीगाळ करत होता.
दरम्यान, आरोपी मारुती कोळेकर याने गॅरेज मध्ये दुरुस्तीसाठी आलेल्या दुचाकी गाड्या ढकलुन दिल्या. आरोपीने आरडा ओरडा करुन जाणाऱ्या येणा-या लोकांचे दिशेने हवेत लोखंडी कोयता उंचावून कोणी जर मध्ये आलात तर एक एकाला कापून टाकीन, कोणालाही जिवंत सोडणार नाही असे म्हणून परिसरात दहशत निर्माण केली. तसेच फिर्यादी काळभोर यांना आरोपीने कोयत्याने मारण्याची धमकी दिली.
याप्रकरणी नवनाथ काळभोर यांनी लोणी काळभोर पोलीस ठाण्यात तक्रार दिली आहे. त्यानुसार आरोपी मारुती कोळेकर याच्यावर भारतीय हत्यार कायदा कलम ४(२५), महाराष्ट्र पोलीस अधिनियम कलम ३७(१) (३) सह १३५, क्रिमीनल लॉ अमेनमेंट कलम 3, 7 प्रमाणे गुन्हा दाखल करण्यात आला आहे. गुन्हा दाखल होताच लोणी काळभोर पोलिसांनी आरोपीला त्वरित अटक केली आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस हवालदार केतन धेंडे करीत आहेत.
