loni kalbhor : लोणी काळभोर (ता. हवेली) ग्रामपंचायत हद्दीतील तरवडी रानमळा येथे महावितरणाच्या डीपीला शॉर्टसर्किटमुळे भीषण आग लागल्याची घटना गुरुवारी (ता. 16) दुपारी अडीज वाजण्याच्या सुमारास घडली. सुमारे तीन तासांच्या अथक प्रयत्नांनंतर स्थानिक शेतकऱ्यांनी ही आग आटोक्यात आणत मोठा अनर्थ टाळला.
मिळालेल्या माहितीनुसार, डीपीमध्ये अचानक शॉर्टसर्किट होऊन आग लागली. काही क्षणांतच आगीने रौद्र रूप धारण केले. परिसरात कोरडी झुडपे व शेती असल्याने आग अधिक पसरू शकते, अशी भीती निर्माण झाली होती. या घटनेची माहिती मिळताच, स्थानिक शेतकरी तात्काळ घटनास्थळी धावले. सागर काळभोर यांनी तत्परता दाखवत महावितरण कार्यालयाशी संपर्क साधून डीपीमध्ये आग लागल्याची माहिती दिली. त्यानंतर वायरमन गिरी यांना कळवून वीजपुरवठा तातडीने बंद करण्यात आला. यामुळे मोठा अपघात टळला.
यानंतर सागर काळभोर, विकास काळभोर, आनंद काळभोर व अनिल कामठे या शेतकऱ्यांनी ओढा आणि विहिरीतून पाणी आणून आगीवर नियंत्रण मिळवण्यासाठी शर्थीचे प्रयत्न सुरू केले. जवळपास तीन तासांच्या अथक प्रयत्नांनंतर सायंकाळी सहाच्या सुमारास आग पूर्णपणे विझवण्यात यश आले.
या घटनेत सुदैवाने कोणतीही जीवितहानी झाली नाही. मात्र, शेतकऱ्यांच्या तत्परतेमुळे आणि धाडसामुळे मोठी दुर्घटना टळल्याचे स्पष्ट झाले आहे. स्थानिक नागरिकांकडून या शेतकऱ्यांचे कौतुक होत असून, संकटाच्या वेळी दाखवलेल्या धैर्यामुळे त्यांनी पुन्हा एकदा माणुसकीचा आदर्श निर्माण केला आहे.
