Loni kalbhor : कवडी माळवाडी येथील नागरिकांना दरवर्षी उन्हाळ्यात पाण्याच्या टंचाईचा सामना करावा लागतो. यामध्ये अनेक सोसायट्यांना वॉटर टँकरने पाणी विकत घ्यावे लागते. कदमवाकवस्ती (ता. हवेली) ग्रामपंचायतीला जल जीवन मिशन योजनेअंतर्गत 89 कोटी रुपयांचा निधी मंजूर झाला असून या योजनेचा काम प्रगती पथावर आहे. परंतु, येथील नागरिकांचा पाण्याचा प्रश्न मार्गी लागत नव्हता. अखेर प्रशासनाकडून कवडी माळवाडीतील सुमारे दहा हजार लोकसंख्येचा पाण्याचा प्रश्न कायमचा मार्गी लावला आहे.
कदमवाकवस्ती (ता. हवेली) ग्रामपंचायतीने कवडी माळवाडीतील पाण्याचा प्रश्न कायमस्वरूपी मार्गी लावण्यासाठी लोकवर्गणी व शासनाकडून निधी उपलब्ध करून नायर कुटुंबाची 4 गुंठे जागी विकत घेतली आहे. या जागेवर 6 लक्ष लिटर क्षमतेची पाण्याची टाकी बांधण्यात येणार आहे. या टाकीचे भूमिपूजन आदर्श माजी सरपंच गणपत काळभोर यांच्याहस्ते रविवारी (ता.23) करण्यात आले. यावेळी कदमवाकवस्तीचे उपसरपंच नासेर पठाण, माजी सरपंच चित्तरंजन गायकवाड, गौरी गायकवाड, माजी उपसरपंच राजश्री काळभोर, अशोक कदम आदी मान्यवर उपस्थित होते.
यावेळी बोलताना चित्तरंजन गायकवाड म्हणाले की, स्व. माजी आमदार बाबुराव पाचर्णे साहेब यांच्यामुळे अथक प्रयत्नांमुळे कदमवाकवस्ती गावाला प्रशासनाकडून जल जीवन मिशन योजनेअंतर्गत 89 कोटी रुपयांचा निधी मिळाला आहे. नागरिकांच्या हितासाठी ही योजना प्रभावीपणे राबविताना अनेक जणांनी आडकाठी आणली. परंतु, आम्ही चंग बांधला होता की, काहीही झाले तरी ही योजना पूर्ण करणारच. आणि त्या अनुषंगाने आम्ही जनतेच्या हितासाठी निरपेक्षपणे कामे करत आहेत.
चार गुंठ्यांची किंमत 84 लाख रुपये होत होती. शासनाकडून जमीन खरेदी करण्यासाठी 42 लाख रुपये उपलब्ध झाले. तर 42 लाख रुपये लोकवर्गणीतून जमा झाले आहे. यामध्ये उद्योजक बाबुशेठ काळभोर यांनी 5 लाख रुपये देऊन मोठी आर्थिक मदत केली आहे. परंतु, सध्या बाजारभाव वाढले असल्याने नायर कुटुंबाला नवपरिवर्तन फौंडेशनच्या वतीने 4 लाख देऊन हा व्यवहार जुळवून आणला आहे. आणि याचा पुढील काही दिवसात नागरिकांना नक्कीच फायदा होईल.
दरम्यान, गावातील प्रत्येक घरात पाणी मिळावे. यासाठी तळमळ सुरु आहे. त्यामुळे शासनाची जलजीवन मिशन योजना ही गावासाठी वरदान ठरणार आहे. त्यामुळे गावाच्या सर्वांगीण विकासासाठी कोणीही अडथळा आणून काम बंद करू नये. तसेच नागरिकांच्या काही समस्या अथवा अडचणी असतील तर माझ्याशी संपर्क करा. मी निपक्षपणे तुमचे प्रश्न सोडविण्याचा प्रयत्न करणार आहे. असे गायकवाड यांनी यावेळी बोलताना सांगितले आहे.
या भूमीपूजनाच्या दिवशी माजी सरपंच गणपत काळभोर यांनी या कामांसाठी 1 लाख रुपयांचा मदत देण्याचे जाहीर केले. त्या बद्दल चित्तरंजन गायकवाड यांनी गणपत काळभोर यांच्यासह सर्व देणगीदार व सहकार्य करणाऱ्या ग्रामस्थांचे आभार मानतो. यावेळी लोणी काळभोर पोलीस ठाण्याचे पोलीस उपनिरीक्षक उदय काळभोर, सेवानिवृत्त पोलीस उपनिरीक्षक संजय चांदणे, पोलीस हवालदार तेजस जगदाळे, ग्रामपंचायत सदस्य आकाश काळभोर, कोमल काळभोर,सिमिता लोंढे, बिनाताई काळभोर,अविनाश बडदे, सोनाली शिंदे, माजी सदस्य जयसिंग घाडगे, सूर्यनारायण काळभोर, मुकुंद काळभोर,चंद्रदिप काळभोर, माऊली तात्या काळभोर व ग्रामस्थ मोठ्या संख्येने उपस्थित होते.
