पुणे : मैत्रिणीबरोबर गप्पा मारीत असलेल्या एका १७ वर्षीय मुलाच्या डोक्यात बिअरची बाटली आणि रोपटे असलेली कुंडी घालून खून केल्याची धक्कादायक घटना घडली आहे. वडगाव बुद्रुक परिसरातील पाऊंजाई मंदिरामागील घुले नगर या परिसरात रविवारी (ता. २५) दुपारी सव्वा बारा वाजण्याच्या सुमारास हि घटना घडली आहे.
नागेश सिध्दाप्पा चिंचोळे (वय- १७, रा. जाधवनगर, वडगाव बुद्रुक) असे खून झालेल्या अल्पवयीन मुलाचे नाव आहे. प्रेम प्रकरणातून हा खून झाल्याचा प्राथमिक अंदाज सिंहगड रोड पोलिसांनी वर्तवला आहे.
मिळालेल्या माहितीनुसार, वडगाव बुद्रुक परिसरातील पाऊंजाई मंदिरामागील घुले नगर या परिसरात नागेश हा त्याच्या मैत्रिणीबरोबर गप्पा मारीत बसला होता. यावेळी अज्ञात हल्लेखोरांनी सदर ठिकाणी जाऊन नागेशच्या डोक्यात एक बिअरची बाटली आणि रोपटे असलेली कुंडी घातली. बिअरची बाटली एवढ्या जोरात मारली कि ज्यामुळे नागेशच्या डोक्यातून मोठ्या प्रमाणात रक्तस्राव होऊ लागल्याने तो जमिनीवर कोसळला. जोरात मार लागल्याने जमिनीवर पडलेल्या नागेशचा त्यातच मृत्यू झाल्याची माहिती मिळाली आहे. यावेळी हल्लेखोर हल्ला करून पसार झाले आहेत.
दरम्यान, सिंहगड रोड पोलिस ठाण्याचे अधिकारी आणि कर्मचारी घटनास्थळी दाखल झाले असून गुन्हा दाखल करण्याचे काम सुरू आहे. प्रेम प्रकरणातून हा खून झाल्याचा प्राथमिक अंदाज पोलिसांनी वर्तवला आहे. सिंहगड रोड पोलिस ठाण्यातील अधिकार्‍यांनी घटनास्थळी भेट दिली असून हल्लेखोरांचा शोध सुरू आहे. भरदिवसा अल्पवयीन मुलाचा प्रेम प्रकरणातून खून झाल्याने परिसरात प्रचंड खळबळ उडाली आहे. पोलिस हल्लेखोराच्या मागावर असून आरोपींना लवकर अटक करण्यात येईल असे पोलिसांनी सांगितले.
