Pune News: वडगाव शेरी : लोहगाव परिसरातील एका बंद सदनिकेत पती आणि पत्नीचा मृतदेह आढळून आल्याने एकच खळबळ उडाली आहे. पतीचा मृतदेह गळफास घेतलेल्या अवस्थेत होता. तर पत्नीचा मृतदेह बेडवर होता. या दोघांनी आत्महत्या केली, की खून झाला, याबाबत अद्याप खुलासा झालेला नाही. शवविच्छेदन अहवालानंतरच याचे नेमके कारण समोर येईल, असे पोलिसांनी सांगितले.
याबाबत मिळालेल्या अधिक माहितीनुसार, किरण महादेव बोबडे (वय २३), आरती किरण बोबडे (वय २०, दोघे राहणार रा. वडगाव शिंदे रोड, लोहगाव) अशी दोघांची नावे आहेत. ही घटना सोमवारी सकाळी अकरा वाजण्याच्या सुमारास येथील लोहगाव वडगाव शिंदे रोड लेक व्हिव सिटी या सोसायटीत उघडकीस आली आहे. याप्रकरणी विमानतळ पोलीस ठाण्यात अकस्मात मृत्यूची नोंद करण्यात आली आहे.
पोलिसांनी दिलेल्या माहितीनुसार, बोबडे दाम्पत्य राहात असलेल्या घरातून दुर्गंधी येत असल्याचे घरमालक प्रशांत यादव यांच्या सोमवारी (ता. ६) निदर्शनास आले. त्यांनी याबाबतची माहिती पोलीस नियंत्रण कक्षाला दिली. पोलिसांनी तत्काळ घटनास्थळी धाव घेतली. त्यावेळी बोबडे यांच्या खोलीचा दरवाजा आतून बंद होता. दरवाजा तोडून पोलिसांनी आत प्रवेश केला असता, किरणचा मृतदेह छताच्या हुकाला गळफास घेतलेल्या अवस्थेत आढळला तर पत्नी आरती ही बेडवर मृत अवस्थेत आढळली. पत्नीचा मृतदेह सडण्यास सुरूवात झाली होती. दरम्यान, शनिवारी सकाळपासून त्यांच्या खोलीचा दरवाजा बंद होता. त्यामुळे दोन दिवसांपूर्वी ही घटना घडल्याचा अंदाज पोलिसांनी वर्तवला आहे.
पंचनाम्यानंतर दोघांचे मृतदेह शवविच्छेदनासाठी ससून रुग्णालयात पाठविण्यात आले. किरण हे पोस्टात कंत्राटी नोकरी करत होते. ते मूळचे माजलगाव बीड येथील रहिवासी आहेत. तर आरती या येरवड्यातील असून, एका खासगी बँकेत नोकरीला होत्या. काही दिवसांपूर्वीच त्यांचा विवाह झाला होता. गेल्या पाच महिन्यांपासून ते या घरात भाड्याने राहत होते.
लोहगाव परिसरातील एका सदनिकेत पती-पत्नीचे मृतदेह आढळून आले आहेत. याबाबत पोलीस ठाण्यात अकस्मात मृत्यूची नोंद केली आहे. शवविच्छेदन अहवाल प्राप्त झाल्यानंतरच नेमके कारण समोर येईल.
– आनंदराव खोबरे, वरिष्ठ पोलीस निरीक्षक, विमानतळ पोलीस ठाणे
