पुणे: पुणे ग्रामीण पोलिसांच्या स्थानिक गुन्हे अन्वेषण शाखेने यवत पोलीस ठाण्याच्या हद्दीत कारवाई करत बेकायदा गावठी पिस्तूल बाळगणाऱ्या एका 21 वर्षीय युवकाला अटक केली आहे. आरोपीकडून एक गावठी लोखंडी पिस्तूल जप्त करण्यात आले असून त्याच्याविरोधात शस्त्र अधिनियमांतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, 27 जून रोजी सायंकाळी सुमारे 6 वाजण्याच्या सुमारास स्थानिक गुन्हे अन्वेषण शाखेचे पथक यवत पोलीस ठाण्याच्या हद्दीत गस्त घालत होते. यावेळी गुप्त बातमीदारामार्फत सहजपूर गावातील मेहेत्रे वस्ती परिसरात सोलापूर महामार्गालगत एक युवक कमरेला गावठी पिस्तूल घेऊन संशयास्पदरीत्या उभा असल्याची माहिती मिळाली.
यानंतर पोलिसांनी पंचांसह घटनास्थळी धाव घेत संशयित मनोज विलास सोनवणे (वय 21, रा. चंदनवाडी, ता. दौंड, जि. पुणे) याला ताब्यात घेतले. त्याची झडती घेतली असता त्याच्या कमरेला विनापरवाना गावठी लोखंडी पिस्तूल आढळून आले. पोलिसांनी तत्काळ शस्त्र जप्त करून आरोपीला अटक केली.
या प्रकरणी यवत पोलीस ठाण्यात गुन्हा रजिस्टर क्रमांक 653/2026 अन्वये शस्त्र अधिनियमाच्या कलम 3 आणि 25 अंतर्गत गुन्हा दाखल करण्यात आला आहे. आरोपीची वैद्यकीय तपासणी करून पुढील कारवाईसाठी त्याला यवत पोलिसांच्या ताब्यात देण्यात आले आहे.
ही कारवाई पुणे ग्रामीणचे पोलीस अधीक्षक संदीप सिंह गिल, अप्पर पोलीस अधीक्षक गणेश बिरादार, उपविभागीय पोलीस अधिकारी बापूराव दडस आणि स्थानिक गुन्हे अन्वेषण शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली करण्यात आली. कारवाईत सहायक फौजदार सचिन घाडगे, आसिफ शेख तसेच पोलीस हवालदार गुरु गायकवाड, सुभाष राऊत, योगेश नागरगोजे आणि विकास कापरे यांनी सहभाग घेतला.
