अक्षय टेमगिरे
शिरूर : शिरूर येथील ग्रामीण रुग्णालयात ड्युटीवर असताना मद्यप्राशन करून गोंधळ घातल्याप्रकरणी एका डॉक्टरविरुद्ध शिरूर पोलीस ठाण्यात महाराष्ट्र दारुबंदी कलमान्वये गुन्हा दाखल करण्यात आला असून या घटनेमुळे आरोग्य विभागात खळबळ उडाली आहे.
पोलीसांनी दिलेल्या माहितीनुसार, डॉ. विलास आनंदराव कांदळकर वय ५८, रा. कवठे यमाई, ता. शिरूर, जि. पुणे हे २७ जून रोजी शिरूर ग्रामीण रुग्णालयात १०८ रुग्णवाहिका सेवेसाठी ड्युटीवर होते.
यावेळी नगरसेवक सुनील जाधव व एजाज बागवान यांनी शिरूर पोलीस ठाण्यात लेखी अर्ज देऊन संबंधित डॉक्टर मद्यधुंद अवस्थेत असून रुग्णालयात गोंधळ घालत आहेत तसेच जखमी रुग्णांना उपचारासाठी मदत करत नसल्याची तक्रार केली होती.
तक्रारीची गंभीर दखल घेत पोलिसांनी डॉक्टरांची वैद्यकीय तपासणी केली असता तपासणीत त्यांनी मद्यप्राशन केल्याचे निष्पन्न झाल्यानंतर शिरूर पोलीस ठाण्यात गुन्हा दाखल करण्यात आला आहे.
या प्रकरणी पोलीस अंमलदार संदीप अशोक खेडकर यांनी फिर्याद दिली असून २७ जून रोजी रात्री ८ वाजून ३३ मिनिटांनी नोंदविण्यात आला असून.
ड्युटीवर असताना डॉक्टर मद्यधुंद अवस्थेत आढळल्याच्या या घटनेमुळे रुग्णसेवा आणि आरोग्य व्यवस्थेवर प्रश्नचिन्ह निर्माण झाले असून, संबंधित प्रकरणात पुढील कायदेशीर कारवाईकडे नागरिकांचे लक्ष लागले असून शिरूर पोलीस स्टेशनचे पोलीस निरीक्षक विनोद पाटील यांच्या मार्गदर्शनाखाली पुढील तपास पोलीस हवालदार काळे करीत आहेत
