न्हावरे : उरळगाव (ता.शिरूर) परिसरातील आफळेवस्ती येथे शुक्रवारी (ता.१८)मध्यरात्रीच्या सुमारास तिघा अज्ञात चोरट्यांनी एका घरात घुसून, महिलेला लोखंडी गजाने मारहाण करत सुमारे २ लाख ४५ हजार रुपयांचा ऐवज चोरून नेल्याची धक्कादायक घटना घडली. या जबरी घरफोडीमुळे परिसरात भीतीचे वातावरण निर्माण झाले आहे.
याप्रकरणी मनिषा हरिदास आफळे (वय २३,रा.उरळगाव-आफळेवस्ती, ता.शिरूर,जि.पुणे) यांनी शिरूर पोलीस ठाण्यात फिर्याद दाखल केली असून, शिरूर पोलिसांनी अज्ञात चोरांविरुद्ध गुन्हा दाखल केला आहे.
घटनेची सविस्तर माहिती अशी की, मनिषा आफळे यांचे पती कांद्याच्या वाहतुकीचे काम करतात.त्यामुळे गुरुवारी(ता.१७)रात्री ते गुलटेकडी (पुणे)येथे कांदा घेऊन गेले होते.घरात मनिषा आफळे त्यांच्या दोन लहान मुलांसह बेडरूममध्ये झोपल्या होत्या व त्यांची सासू दुसऱ्या खोलीत तर सासरे गोठ्यात झोपले होते.दरम्यान, मध्यरात्री तीन चोरांनी जोर-जोरात धक्के देऊन बेडरूमचा दरवाजा उघडला व घरात प्रवेश केला.त्यानंतर मनिषा आफळे यांना लोखंडी गजाने डोक्यावर मारहाण करून,कपाटातील मणी मंगळसूत्र,डोरलं,गंठण,अंगठी आणि ६५ हजार रुपये रोख रक्कम असा एकूण २ लाख ४५ हजार रुपयांचा ऐवज चोरून नेला.
मनिषा आफळे यांनी दिलेल्या फिर्यादीनुसार,तीन चोरांपैकी दोघांनी तोंडाला रूमाल बांधला होता व एकाने मास्क घातला होता.तिघांनीही काळ्या रंगाचे जर्किंग घातले होते. तसेच त्यांच्या हातात कोयता व लोखंडी गज होते.अशी माहिती मनिषा आफळे यांनी पोलिसांना दिली आहे.
घटनेची माहिती मिळताच शिरूर पोलीस ठाण्याचे पथक घटनास्थळी दाखल झाले असून,श्वान पथकाच्या साह्याने चोरांचा माग काढण्याचा प्रयत्न करण्यात आला.त्याचप्रमाणे परिसरातील सीसीटीव्ही फुटेजही तपासण्यात येत आहेत.
याप्रकरणी अज्ञात चोरांचा शोध सुरू असून,शिरूर पोलीस ठाण्याचे पोलीस निरीक्षक संदेश केंजळे यांच्या मार्गदर्शनाखाली शिरूर व न्हावरे पोलीस पुढील अधिक तपास करीत आहेत.चोरांनी केलेल्या मारहाणीत मनिषा आफळे यांच्या डोक्याला गंभीर स्वरूपाची दुखापत झाली आहे.त्यांच्यावर न्हावरे येथील ग्रामीण रुग्णालयात उपचार सुरू आहेत.
