पुणे: लोहगाव विमानतळासमोरील एरोमॉलमध्ये वारंवार बुकिंग रद्द करणाऱ्या कॅब चालकांविरोधात आता थेट कारवाई करण्यात येणार आहे. काही कॅब चालक प्रवाशांकडून बुकिंग आल्यानंतर लोकेशन जवळचे असल्यास किंवा पेमेंट मोड न पटल्यास बुकिंग रद्द करत आहेत. यामुळे प्रवाशांची मोठी गैरसोय होत असून, विशेषतः रात्रीच्या वेळेस प्रवासी अडचणीत सापडत आहेत.
या प्रकाराबाबत एरोमॉल प्रशासनाकडे सतत तक्रारी येत होत्या. त्यामुळे प्रशासनाने याची गंभीर दखल घेऊन अशा कॅब चालकांवर थेट कारवाई करण्याचा निर्णय घेतला आहे. बुकिंग रद्द करणाऱ्या चालकांना एरोमॉल परिसरात प्रवेश नाकारण्यात येणार असल्याचे प्रशासनाने जाहीर केले आहे.
काही चालकांकडून अतिरिक्त रक्कमही आकारली जात होती
प्रवाशांनी तक्रार केली आहे की, काही चालक जास्तीची रक्कम मागतात किंवा पेमेंट अॅप्स स्वीकारत नाहीत. हे सर्व प्रकार प्रवाशांच्या अनुभवावर विपरीत परिणाम करत असून, विश्वासार्ह सेवा देण्याच्या हेतूने आता कठोर पावले उचलली जात आहेत.
लोहगाव एरोमॉलचे उपाध्यक्ष युवराजसिंग राजपूत यांनी सांगितले की, “बुकिंग रद्द करणाऱ्या चालकांवर दंडात्मक कारवाई केली जाईल आणि त्यांच्या वाहनांना एरोमॉलमध्ये प्रवेश दिला जाणार नाही. प्रवाशांना अडचणी टाळण्यासाठी आणि दर्जेदार सेवा पुरवण्यासाठी आम्ही ही भूमिका घेत आहोत.”
एरोमॉलच्या अंतर्गत सर्वेक्षणात मागील दोन आठवड्यांत एकूण कॅब बुकिंगपैकी सुमारे ३० टक्के बुकिंग चालकांनी रद्द केल्याचे समोर आले आहे. काही चालक प्रवाशांचे लोकेशन पाहून किंवा त्यांच्या पेमेंट मोडवरूनही बुकिंग नाकारत असल्याचे आढळून आले आहे.
