अकोला: अकोला येथे एका विधवा महिलेवर अत्याचार केल्याच्या प्रकरणात आरोपी सरदार खान याचा जामीन अर्ज न्यायालयाने फेटाळला आहे. या प्रकरणी आरोपीविरोधात गुन्हा दाखल असून सध्या तो पोलीस कोठडीत आहे.
पोलिसांनी दिलेल्या माहितीनुसार, पीडित महिलेचे लग्न 2001 मध्ये झाले होते आणि 2015 मध्ये तिच्या पतीचे निधन झाले. त्यानंतर ती आपल्या मुलांसह दहिगाव परिसरात राहत होती. या काळात तिची ओळख आरोपी सरदार खान याच्याशी झाली. आरोपीने पत्नीला तलाक देऊन लग्न करण्याचे आश्वासन दिल्याचे सांगितले जाते. या आश्वासनावरून दोघांमध्ये संबंध निर्माण झाले, मात्र नंतर आरोपीने लग्नास नकार दिला. (Love jihad Case )
तक्रारीनुसार, 2025 मध्ये आरोपीने पुन्हा संपर्क साधून महिलेवर दबाव टाकला. धमक्यांमुळे पीडित महिला आरोपीला भेटायला गेल्यानंतर त्याने जबरदस्तीने वारंवार अत्याचार केल्याचा आरोप आहे. तसेच या घटनांचे व्हिडिओ आणि फोटो काढून ब्लॅकमेल केल्याचेही नमूद करण्यात आले आहे. महिलेवर मारहाण करून जबरदस्तीने अन्न खायला लावणे आणि इतर प्रकारे छळ केल्याचेही आरोप आहेत. आरोपीने आपल्या ओळखीतील व्यक्तीला देखील पीडितेसोबत संबंध ठेवण्यास भाग पाडल्याचा आरोप तक्रारीत करण्यात आला आहे.
या प्रकरणाचा तपास पोलीस उपनिरीक्षक भटकर करत आहेत. आरोपीने न्यायालयात जामिनासाठी अर्ज केला होता, मात्र जामीन मंजूर झाल्यास पीडितेच्या आणि तिच्या कुटुंबाच्या सुरक्षिततेला धोका निर्माण होऊ शकतो, असे नमूद करत न्यायालयाने अर्ज फेटाळला आहे.
