Fursungi : घर बांधण्याचे स्वप्न दाखवून एका महिलेकडून तब्बल 62 लाखांहून अधिक रक्कम उकळून जमीन न देता फसवणूक केल्याचा धक्कादायक प्रकार फुरसुंगी परिसरात उघडकीस आला आहे. या प्रकरणी फुरसुंगी पोलीस ठाण्यात दाम्पत्याविरोधात गुन्हा दाखल करण्यात आला असून, या प्रकारामुळे परिसरात एकच खळबळ उडाली आहे.
सुयोग प्रकाश खळदकर आणि अश्विनी सुयोग खळदकर (दोघेही रा. ग्रीण किस्टा सोसायटी, भोसले व्हिलेज भेकराईनगर, हडपसर) असे गुन्हा दाखल करण्यात आलेल्या दाम्पत्यांची नावे आहेत. याप्रकरणी कोपीला शेरबहादुर राणा (वय 47, रा. गोंधळेनगर, हडपसर) यांनी फुरसुंगी पोलीस ठाण्यात तक्रार दिली आहे.
पोलिसांनी दिलेल्या माहितीनुसार, फिर्यादी कोपीलाराणा या गेल्या 30 वर्षांपासून गोंधळेनगर परिसरात वास्तव्यास आहेत. कुटुंबासाठी मोठे घर बांधण्याच्या उद्देशाने त्या 2021 पासून फुरसुंगी भागात जागेच्या शोधात होत्या. याच दरम्यान त्यांची ओळख गौतम कांबळे या इसमाशी झाली. त्याने आपल्या मित्राची फुरसुंगी येथे जागा असल्याचे सांगत सुयोग प्रकाश खळदकर याची ओळख करून दिली. खळदकर याने फुरसुंगी येथील सर्व्हे नं. 183, हिस्सा नं. 13/1अ येथील जागा दाखवून ती आपल्या आजी सरस्वती हरपळे यांच्या नावावर असून ती स्वतःच्या नावावर केल्याचे सांगितले.
सदर जागा पसंत पडल्याने राणा यांनी 2.5 गुंठे जागा घेण्याचा निर्णय घेतला. प्रति गुंठा 30 लाख दराने एकूण 75 लाख रुपयांत व्यवहार ठरला. त्यानुसार राणा यांनी 13 डिसेंबर 2021 पासून ते 25 एप्रिल 2024 पर्यंत विविध टप्प्यांमध्ये चेक आणि ऑनलाईन पद्धतीने एकूण 57 लाखांहून अधिक रक्कम अदा केली. तसेच करारनाम्यासाठी 7 लाख रुपये रोख दिल्याचेही तक्रारीत नमूद आहे. एकूण मिळून त्यांनी सुमारे 62 लाख 90 हजार 800 रुपये दिले.
दरम्यान, 20 डिसेंबर 2021 रोजी हवेली येथील दुय्यम निबंधक कार्यालयात कुलमुखत्यारपत्र व विकास करारनामा करण्यात आला. मात्र, एवढी मोठी रक्कम देऊनही खळदकर यांनी ना जागा ताब्यात दिली, ना पैसे परत केले. वारंवार पाठपुरावा करूनही प्रतिसाद न मिळाल्याने अखेर आपली फसवणूक झाल्याचे लक्षात येताच राणा यांनी पोलिसांकडे धाव घेतली. पैसे मागण्यासाठी गेल्यावर आरोपींनी शिवीगाळ करत धमकी दिल्याचाही आरोप आहे. या प्रकरणी सुयोग प्रकाश खळदकर आणि अश्विनी सुयोग खळदकर यांच्याविरोधात भारतीय न्याय संहिता (BNS) 2023 अंतर्गत कलम 3(5), 318(4), 351(2) आणि 352 नुसार गुन्हा दाखल करण्यात आला आहे.
