पुणे: पिंपरी-चिंचवड शहराला एका भीषण घटनेने हादरवून सोडले आहे. निगडी प्राधिकरणात राहणाऱ्या एका बड्या बांधकाम व्यावसायिकाच्या घरात मध्यरात्री ४ ते ५ सशस्त्र दरोडेखोरांनी दरोडा टाकला. त्यांनी व्यावसायिका चंद्रभान अग्रवाल यांना बांधून कोंडून ठेवले, मात्र अग्रवाल यांनी दाखवलेल्या धाडसामुळे हा प्रकार उघडकीस आला. लाखोंचा ऐवज घेऊन दरोडेखोर पसार झाले असून, या घटनेने परिसरात भीतीचे वातावरण आहे.
शनिवारी रात्री ९ वाजताच्या सुमारास चंद्रभान छोटूराम अग्रवाल हे त्यांच्या बंगल्यात एकटेच होते. हॉलमध्ये बसले असताना मुख्य दरवाजा उघडा राहिला. याच संधीचा फायदा घेऊन ४ ते ५ सशस्त्र हल्लेखोर घरात घुसले. त्यांनी क्षणाचाही विलंब न लावता अग्रवाल आणि त्यांच्या नोकरांना पकडले. त्यांचे हातपाय बांधून त्यांना वेगवेगळ्या खोल्यांमध्ये कोंडून ठेवले. दरोडेखोरांनी घरात ठेवलेली रोकड आणि इतर लाखो रुपयांचा ऐवज गोळा करण्यास सुरुवात केली.
दरोडेखोरांनी आपल्याला बांधून ठेवले असतानाही चंद्रभान अग्रवाल यांनी हिंमत हारली नाही. त्यांनी अतिशय शिताफीने आपल्या हातातील गाठ सैल करून कशीबशी स्वतःची सुटका करून घेतली. त्यानंतर, त्यांनी गॅलरीमध्ये धाव घेतली आणि बाहेरून दरवाजा लावून घेतला. गॅलरीत उभे राहून त्यांनी जीवाच्या आकांताने ‘मदत करा, दरोडा, दरोडा…!’ अशा हाका मारण्यास सुरुवात केली.
अग्रवाल यांचा मदतीसाठी ओरडत असल्याचा एक व्हिडिओ देखील लगेच व्हायरल झाला. हा थरारक व्हिडिओ पाहून परिसरातील शेकडो नागरिक आणि तरुण त्यांच्या मदतीला धावले. मात्र, दरोडेखोरांकडे शस्त्रे असल्याची माहिती मिळाल्याने कोणीही घरात शिरण्याची हिंमत केली नाही. नागरिकांनी तातडीने पोलिसांना माहिती दिली.
नागरिकांनी पोलिसांना घटनेची माहिती देऊनही, सशस्त्र पोलीस दल घटनास्थळी पोहोचायला बराच वेळ लागला. तोपर्यंत दरोडेखोर चोरीचा माल घेऊन अंधाराचा फायदा घेत तिथून पसार झाले होते.
रात्री उशिरापर्यंत अग्रवाल यांच्या बंगल्यासमोर पोलिसांचा मोठा बंदोबस्त होता आणि शेकडो नागरिकांनी गर्दी केली होती. दरोडेखोर कोण होते आणि यामागे कोणाचा हात होता, याबाबतची माहिती अजूनही अस्पष्ट आहे. पोलिसांनी गुन्हा दाखल केला असून, या प्रकरणाचा कसून तपास करत आहेत. या घटनेमुळे पिंपरी-चिंचवडमधील नागरिकांमध्ये सुरक्षिततेबाबत चिंता वाढली आहे.
