पुणे: पुण्यात शहर आणि परिसरात मध्यरात्रीपासून सुरू असलेल्या मुसळधार पावसामुळे शहरातील विविध भागांत झाडे कोसळण्याच्या १३ घटना घडल्याने वाहतुकीवर परिणाम झाला, मात्र सुदैवाने कोणतीही जीवितहानी झाली नाही.
अग्निशामक दलाच्या नियंत्रण कक्षाकडून मिळालेल्या माहितीनुसार, सोमवारी दिवसभर सुरु असलेल्या पावसामुळे शहरातील अनेक भागांमध्ये झाडे कोसळली, दरम्यान, काही काळ वाहतूक विस्कळीत झाली होती. घटनास्थळी धाव घेत अग्निशामक दलाच्या जवानांनी तात्काळ कोसळलेली झाडे आणि फांद्या बाजूला करून रस्ते वाहतुकीसाठी मोकळे केले.
झाडे कोसळण्याबरोबरच, शहरातील फडके हौद चौक परिसरात एका जुन्या वाड्याची भिंत कोसळल्याची घटना घडली. तसेच, धायरी भागात एक मोठा जाहिरात फलकही वादळी वाऱ्यासह कोसळला. या दोन्ही घटनांमध्येही सुदैवाने कोणीही जखमी झाले नाही, त्यामुळे मोठी दुर्घटना टळली.
पुढील काही दिवसही शहरात पावसाचा जोर कायम राहण्याची शक्यता हवामान विभागाने वर्तवली आहे. नागरिकांनी सतर्क राहावे, असे आवाहन पुणे महानगरपालिकेकडून करण्यात आले आहे.
