खडकवासला, (पुणे) : पुणे-पानशेत रस्त्यावरील ओसाडे येथील खडकवासला धरणाच्या तीरावर सुरु असलेल्या बेकायदा गावठी दारू विक्री धंद्यावर वेल्हे पोलिसांनी छापा टाकला. त्यावेळी मुद्देमाल जागेवर सोडून धरणाच्या पाणलोट क्षेत्रात उडी मारून सराईत दारू विक्रेत्याने पळून जाण्याचा प्रयत्न केला. त्यावेळी पोलिस उपनिरीक्षक आप्पासाहेब पडळकर यांनी अंगावरील कपड्यांनिशी उडी टाकून दारू विक्रेत्याचा पाठलाग करून ताब्यात घेतलं.
पाणलोट क्षेत्रात आरोपी आणि पोलीस यांच्यात तब्बल अर्धा-पाऊण तास रंगलेले थरारनाट्य पाहून परिसरातील नागरिक अचंबित झाले. तसेच पडळकर यांच्या साहसी कामगिरीचे परिसरातील नागरिकांनी भरभरून कौतुक केले. अभिमन्यू ईश्वर नानावत (रा. ओसाडे, ता. राजगड) असे अटक केलेल्या दारू विक्रेत्याचे नाव आहे. याप्रकरणी वेल्हे पोलिस ठाण्यात गुन्हा दाखल करण्यात आला आहे.
याबाबत अधिक माहिती अशी की, ओसाडे येथील धरणतीरावर राजरोसपणे बेकायदा दारू विक्री करणाऱ्या दारू धंद्यावर वेल्हे पोलिसांनी शनिवारी (दि. 11) सायंकाळी साडेपाचच्या सुमारास छापा टाकला. पोलिस आल्याची माहिती मिळताच आरोपी नानावत याने खडकवासला धरणाच्या पाणलोट क्षेत्रात उडी मारली. तो धरणात पोहत पलीकडील सांगरुण गावच्या तीराकडे पळून चालला होता.
त्या वेळी क्षणाचाही विलंब न करता पडळकर यांनी अंगावरील कपड्यांसह धरणात उडी मारून वेगाने पोहून पाठलाग करत नानावत याला धरणाच्या मध्यभागीच ताब्यात घेतले. ही कारवाई सहायक पोलिस निरीक्षक, नितीन खामगळ यांच्या मार्गदर्शनाखाली पोलीस उपनिरीक्षक आप्पासाहेब पडळकर, सहाय्यक फौजदार राजाराम होले, पोलिस हवालदार पंकज मोघे, मयूर जगताप यांच्या पथकाने केली.
