मुंबई: गेल्या काही दिवसांपासून सोन्या आणि चांदीच्या दरांमध्ये मोठी अस्थिरता पाहायला मिळत असून, यामुळे गुंतवणूकदार संभ्रमात पडले आहेत. आठवड्याच्या सुरुवातीला दोन्ही मौल्यवान धातूंनी जोरदार वाढ नोंदवली होती. मात्र मंगळवारी व्यवहार सुरू होताच नफा वसुलीचा प्रभाव दिसून आला आणि किमती घसरल्या. (Gold Silver Rate Today)
सोमवारी (9 फेब्रुवारी) सोन्याच्या दरात सुमारे 2,798 रुपयांची वाढ झाली होती, तर चांदीच्या किमतीत तब्बल 8,736 रुपयांची झपाट्याने वाढ झाली होती. तथापि, 10 फेब्रुवारी रोजी एमसीएक्सवर व्यवहार सुरू होताच एप्रिल डिलिव्हरीच्या सोन्याचा वायदा दर सुमारे 1.56 लाख रुपये प्रति 10 ग्रॅमच्या पातळीवर व्यवहार करताना दिसला. त्याचवेळी मार्च डिलिव्हरीच्या चांदीचा वायदा दर घसरून सुमारे 2.59 लाख रुपये प्रति किलोवर पोहोचला.
दरम्यान, पुण्यात 22 कॅरेट सोन्याचा दर प्रति 1 ग्रॅम 14,525 रुपये इतका आहे. तर मुंबईतील सराफा बाजारात 24 कॅरेट सोन्याचा दर प्रति 10 ग्रॅम 1,57,920 रुपये इतका नोंदवण्यात आला आहे. 22 कॅरेट सोन्याचा भाव 1,44,760 रुपये असून, 18 कॅरेट सोन्याचे दर 1,18,450 रुपये प्रति 10 ग्रॅम इतके आहेत.
तज्ज्ञांच्या मते, डॉलर निर्देशांकातील हालचाली, आंतरराष्ट्रीय भू-राजकीय घडामोडी तसेच अमेरिकेच्या आर्थिक धोरणांशी संबंधित संकेत यांचा मौल्यवान धातूंच्या दरांवर थेट परिणाम होत आहे. व्याजदर कपातीच्या अपेक्षांमुळे बाजारात अस्थिरता वाढली असून, पुढील काही काळात सोन्या-चांदीच्या किमतींमध्ये अल्पकालीन चढ-उतार सुरूच राहण्याची शक्यता व्यक्त केली जात आहे.
