संतोष गायकवाड
Pune Crime: वाघोली : पैसे मागतो म्हणून डोक्यात घाव घालत खून केल्याची घटना लोहगाव येथे घडली आहे. त्यानंतर दुचाकीसह मृतदेह खाणीत टाकून अपघात झाल्याचा बनाव केला. मात्र, तो बनाव असल्याचे कळाल्यानंतर खून करणाऱ्या चौघांना लोणीकंद पोलिसांनी बेड्या ठोकल्या.
गणेश नाईक (रा. पवार वस्ती, लोहगाव), लक्ष्मण नारायण इमनेलू (रा. पवार वस्ती, लोहगाव), मोनू व साजन अशी खून करणाऱ्यांची नावे आहेत. तर, बाजीराव सुदाम खांदवे (रा. लोहगाव) यांचा खून झाला आहे. खांदवे यांची जागा नाईक याने भाडेतत्त्वावर घेतली होती. त्यावरून त्यांचा आर्थिक वाद झाला होता. खांदवे हे नाईक याला भाड्याची रक्कम मागत होते. पैसे देतो म्हणून नाईक याने खांदवे यांना बोलावून घेतले. भाड्याची रक्कम द्यायची गरजच पडू नये, यासाठी नाईक याने त्याच्या तीन साथीदारासह खांदवे यांच्या डोक्यात घाव घालून त्यांचा खून केला. त्यानंतर टेम्पोतून त्यांचा मृतदेह व दुचाकी आणून ती वाघोली परिसरातील खाणीत टाकून अपघाताचा बनाव केला. मात्र, त्यांच्या अंगावरील मारहाणीच्या खुणा व अन्य कारणावरून खून झाल्याचे लक्षात आले. खांदवे हे हरविल्याची तक्रार विमानतळ पोलिस ठाण्यात दाखल होती.
