Pune Crime News पुणे: एका महिलेने शारीरिक संबंधाची माहिती युवकाच्या घरच्यांना सांगण्याची धमकी दिली. तसेच गरोदर असल्याचे सांगत गुन्हा दाखल करण्याची धमकी देऊन युवकाला वीस लाख रुपये खंडणी मागितल्याचा प्रकार समोर आला आहे. या प्रकरणी संबंधित महिलेवर हडपसर पोलीस ठाण्यात गुन्हा दाखल करण्यात आला आहे. ही घटना डिसेंबर 2019 ते 28 ऑक्टोबर 2023 दरम्यान हडपसरमध्ये घडली आहे.
याबाबत लोहगावमध्ये राहत असलेल्या 35 वर्षाच्या तरुणाने हडपसर पोलीस ठाण्यात फिर्याद दाखल केली आहे. त्याच्या फिर्यादीनुसार हडपसर येथील महिलेवर आयपीसी 384, 504, 506 नुसार गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी आणि आरोपी महिलेची ओळख झाल्यानंतर त्या दोघांमध्ये शारीरिक संबंध प्रस्थापित झाले. त्यानंतर संबंधित महिलेने फिर्यादी यांना वारंवार फोन करुन भेटण्यासाठी बोलावून घेतले.
जर फिर्यादी हे तिला भेटण्यास गेले नाही, तर त्यांना शारीरिक संबंधाची माहिती घरच्यांना देणार असल्याची धमकी दिली. तसेच गरोदर असल्याचे सांगत गुन्हा दाखल करण्याची धमकी देऊन वारंवार पैसे उकळले. जर हे प्रकरण मिटवायचे असेल तर एक रक्कमी 20 लाख रुपयांची खंडणी फिर्यादीला मागितली. पैसे दिले नाही तर कायदेशीर कारवाई करून नोकरी घालवण्याची धमकी देखील दिल्याचे फिर्यादीत नमूद केले आहे. पुढील तपास हडपसर पोलीस करीत आहेत.
