शिरूर: टाकळी हाजी (ता.शिरूर) येथील ॲड.वसुमती प्रभाकर गावडे (वय-55 वर्षे) यांचे बुधवारी (ता. 27) निधन झाले. ॲड.वसुमती गावडे या पुणे जिल्हा परिषदेचे सेवानिवृत्त मुख्य कार्यकारी अधिकारी प्रभाकर गावडे यांच्या पत्नी होत्या. ॲड.वसुमती गावडे या एक अभ्यासू कायदेतज्ञ होत्या. तसेच कायद्याबरोबरच कृषी, साहित्य, विज्ञान, सहकार, कला व क्रीडा यांसारख्या विविध क्षेत्रांमध्ये त्यांचे मोलाचे योगदान होते.
वसुमती गावडे यांच्या धाकट्या मुलाचा नुकताच सोमवारी (ता. 25) विवाह पार पडला होता. लग्नाच्या तयारीसाठी वसुमती गावडे या पंधरा दिवसांपूर्वीच गावाकडे आल्या होत्या. मात्र, मुलाच्या लग्नाआधीच वसुमती यांची प्रकृती अचानक बिघडली आणि त्यांना शिरूर येथील खासगी रुग्णालयात दाखल करण्यात आले. परंतू पुढे प्रकृती गंभीर झाल्याने त्यांना पुढील उपचारासाठी पुण्यातील एका नामांकित खाजगी रुग्णालयात हलवण्यात आले होते. उपचारादरम्यान त्यांचा मृत्यू झाला.
मुलाचा विवाहसोहळा नातेवाईकांच्या उपस्थितीत पार पडला. परंतू वसुमती गावडे यांची अनुपस्थिती लग्न सोहळ्यात सर्वांनाच जाणवली होती. वसुमती गावडे यांच्या पश्चात पती, दोन मुले, एक मुलगी, सुना व नातवंडे असा मोठा परिवार आहे. त्या टाकळी हाजी विविध कार्यकारी सेवा सहकारी सोसायटीच्या विद्यमान संचालिका आहेत.
