कोल्हापूर : कोल्हापुरातून एक धक्कादायक घटना समोर येत आहेत. गणेश आगमन मिरवणुकीत एका मित्राने आपल्या दुसऱ्या मित्रावर चाकूने हल्ला करत जखमी केले आहे. या घटनेने परिसरात खळबळ उडाली असून, पोलीस या प्रकरणाचा तपास करत आहेत. नेमकं मिरवणुकीत काय घडलं ? जाणून घेऊया…
राजारामपुरीतल्या गणेश आगमन मिरवणुकीत मित्रांमध्ये नाचण्यावर वाद झाला. या वादातून एका मित्राने दुसऱ्या मित्रावर चाकूने हल्ला केला. ज्यात तो गंभीर जखमी झाला. या घटनेनंतर जखमी तरुणाला रुग्णालयात दाखल करण्यात आले असून, त्याच्यावर सध्या उपचार सुरु आहेत.
वाजीद जमादार असं या घटनेत जखमी झालेल्या तरुणाचं नाव आहे. तो आपल्या मित्रांना मिरवणूकीत बोलावत होता. त्याने मित्रांना नाचण्याचा आग्रह केला. यानंतर वाजीदचे मित्र संतप्त झाले आणि त्यांच्यात शाब्दिक बाचाबाची सुरु झाली. काही वेळातच या वादाचे रूपांतर हाणामारी झाले. संतप्त मित्रांनी जमादारावर धारदार चाकूनं हल्ला केला ज्यात जमादार गंभीर जखमी झाला. ही धक्कादायक घटना सीसीटीव्ही कॅमेऱ्यात कैद झाली आहे.
या घटनेची माहिती मिळताच पोलिसांनी तातडीने घटनास्थळी धाव घेत पुरावे ताब्यात घेण्यात आले आहे. पोलीस या प्रकरणाचा तपास करत असून, फक्त मिरवणुकीत नाचण्याच्या कारणावरून वाजीद जमादारवर हल्ला करण्यात आला की यामागे आणखी काही कारण आहे. याची चौकशी करत आहेत.
