‘मी तुला जिवंत सोडणार नाही’ धमकी देत पोलिसावरच सत्तूरने वार; चाकण येथील घटना

चाकण : खराबवाडी (ता. खेड) येथे पोलिस अंमलदाराच्या अंगावर सत्तूरने वार करण्याचा प्रयत्न करणाऱ्या सराईत गुन्हेगारास पोलिसांनी शिताफीने पकडून अटक केली. नवमहाराष्ट्र विद्यालयाजवळ घडलेल्या या घटनेमुळे परिसरात एकच खळबळ उडाली.

अटक करण्यात आलेल्या आरोपीचे नाव दीपक अशोक जंगले (वय 19, रा. खराबवाडी, ता. खेड) असे आहे. याबाबत पोलिस अंमलदार शिवाजी वसंत मरकड यांनी महाळुंगे एमआयडीसी पोलिस ठाण्यात फिर्याद दिली आहे.

पोलिसांच्या माहितीनुसार, दीपक जंगले याच्यावर यापूर्वी आर्म अ‍ॅक्टअंतर्गत गुन्हा दाखल आहे. बुधवारी खराबवाडी परिसरात किरकोळ भांडण झाल्यानंतर तो हातात सत्तूर घेऊन शिवीगाळ करत होता. स्थानिक नागरिकांनी तात्काळ 112 वर कॉल करून या घटनेची माहिती पोलिसांना दिली.

त्यानुसार पोलिस अंमलदार शिवाजी मरकड आणि त्यांचे सहकारी घटनास्थळी पोहोचले. मात्र पोलिसांना पाहताच जंगले संतापला. त्याने मरकड यांना उद्देशून “जिवंत सोडत नाही” अशी धमकी देत जिवे मारण्याच्या उद्देशाने सत्तूरने वार केला. सुदैवाने मरकड यांनी तो वार चुकवला.

यानंतर मरकड यांनी शिताफीने आरोपीला पकडण्याचा प्रयत्न केला. त्यावेळी जंगलेने त्यांच्यासोबत झटापट केली आणि मरकड यांच्या हाताला चावा घेऊन दुखापत केली. शेवटी पोलिसांच्या मदतीने आरोपीला काबूत आणून अटक करण्यात आली. या घटनेचा तपास महाळुंगे एमआयडीसी पोलिस ठाण्याचे अधिकारी करत आहेत.