पुणे : पुण्यातून एक धक्कादायक घटना समोर आली आहे. महाविद्यालयातील तरुणीबरोबर ओळख वाढवून आईशी भेट करुन देतो, असं सांगून तरुणीला घरी घेऊन जात तिच्यावर जबरदस्तीने बलात्कार केला. तसेच तरुणाने तिच्या नकळत बलात्कार केल्याचे व्हिडिओ काढले. त्यानंतर व्हिडिओ व्हायरल करण्याची धमकी देऊन गेली २ महिने या तरुणीला ब्लॅकमेल करुन तिच्यावर वारंवार बलात्कार करत असल्याचा प्रकार समोर आला आहे.
याप्रकरणी एका १८ वर्षाच्या तरुणीने कोंढवा पोलीस ठाण्यात फिर्याद दिली आहे. त्यानुसार पोलिसांनी तिच्या १९ वर्षाच्या क्लासमेटला अटक केली आहे. ही घटना नोव्हेंबर २०२४ ते १२ जानेवारी २०२५ दरम्यान आरोपीच्या घरी व लॉजवर घडली आहे.
पोलिसांनी दिलेल्या माहितीनुसार, फिर्यादी तरुणी आणि आरोपी हे एकाच कॉलेजमध्ये शिक्षण घेत आहेत. आरोपी तरुणाने फिर्यादीला आईची भेट करुन देतो, असे सांगून तिचा विश्वास संपादन करुन घरी आणले. घरी कोणी नसताना तिच्याशी जबरदस्तीने शारीरीक संबंध प्रस्थापित केले. तिच्या नकळत शरीरसंबंध ठेवतानाचा व्हिडिओ काढून फिर्यादीला दाखविला.
त्यानंतर मी ज्यावेळी बोलवीन, त्या वेळेस मला भेटायचे व याबद्दल कोणालाही काही सांगायचे नाही, असं म्हणून तिला धमकावत असे. फिर्यादी कॉलेजला गेले असताना व्हिडिओ व्हायरल करण्याची धमकी देऊन कॉलेजमधून आरोपी तिला लॉजवर घेऊन जात. तिच्याशी जबरदस्तीने शरीरसंबंध ठेवत व नंतर कॉलेजला आणून सोडत असत. फिर्यादी खूप घाबरलेली असल्याने तिने हे कोणाला सांगितले नाही.
मात्र, १२ जानेवारी रोजी फिर्यादीने कॉलेजमध्ये आरोपीने सांगितलेले ऐकले नाही म्हणून कॉलेजच्या लायब्ररीमध्ये कानाखाली मारुन तिच्या हातातील बॅग फेकून मारली. गेली दोन महिने सुरु असलेल्या हा शारीरीक छळ असह्य झाल्याने या तरुणीने पोलिस ठाण्यात धाव घेत घडलेला प्रकार सांगितला. या घटनेचा अधिक तपास पोलीस उपनिरीक्षक हसिना शेख करीत आहेत.
