पुणे: पुण्यातील कोंढवा परिसरातुन एक धक्कादायक घटना समोर आली आहे. येथे एका महिलेने आपल्या जुन्या मित्राला घरी बोलावून त्याच्याविरुद्ध क्रूर कट रचल्याची घटना घडली आहे. मित्राला चहासाठी घरी बोलवले. तो घरी येताच त्याच्या डोळ्यात मिरची पावडर टाकुन मारहाण करत खंडणीची मागणी केल्याची घटना घडली आहे. याप्रकरणी पोलिसांनी सोनल उर्फ सोनी रायकर (वय ३५ वर्ष), अतुल रायकर (पती, वय ३८ वर्ष), रवी मंडल (वय २४ वर्ष), सुशांत हान (वय ३१ वर्ष), (सर्व कोंढवा परिसरातील रहिवासी) असे अटक केलेल्या आरोपींची नावे आहेत.
पीडित व्यक्तीचे वय ३९ वर्षे असून त्याने पोलिसांकडे सविस्तर तक्रार दाखल केली आहे. पिडीत तरुणावर केलेला हल्ला पूर्व नियोजित असल्याची माहीत मिळत आहे. महिलेने हल्ला केल्यानंतर काही वेळातच तिचा पती आणि त्याचे दोन साथीदार घरात आले. चौघांनी मिळून पीडितास अमानुष मारहाण केली. त्यानंतर त्याच्या तोंडात जबरदस्तीने काठी घातली आणि त्याचे हात-पाय दोरीने घट्ट बांधले.
चौघांनी हल्ला केल्यानंतर आरोपींनी पीडिताकडे खंडणीची मागणी केली. त्यामुळे या घटनेमागे सुनियोजित खंडणीचा कट रचल्याचं समोर आलं आहे. सदर घटनेची माहिती मिळताच कोंढवा पोलिसांनी तत्काळ कारवाई करत अवघ्या 4 तासांमध्ये पीडिताची सुटका केली आहे. तसेच याप्रकरणातील चारही आरोपींना बेड्या ठोकल्या आहेत.
