पुणे : पुण्यातील वाघोली परिसारत एक धक्कादायक घटना घडली आहे. अल्पवयीन मुलीला मारहाण करुन वारंवार तिच्यासोबत शारीरिक संबंध प्रस्थापित केले. तसेच पीडित मुलगी गरोदर राहिल्यानंतर गर्भपात करण्यासाठी दबाव टाकल्याचा धक्कादायक प्रकार उघडकीस आला आहे. हा प्रकार जानेवारी २०२३ ते फेब्रुवारी २०२४ या कालावधीत खराडी, वाघोली या ठिकाणी घडला आहे.
याप्रकरणी १७ वर्षीय पीडित मुलीने गुरुवारी २२ फेब्रुवारीला चंदननगर पोलीस ठाण्यात फिर्याद दिली आहे. या फिर्यादीवरून मयुर संजय केंद्रे (वय-२४ रा. खांदवेनगर, लोहगाव पुणे) याच्यावर गुन्हा दाखल केला आहे.
पोलिसांनी दिलेल्या अधिक माहितीनुसार, पीडित मुलगी आणि आरोपी एकमेकांच्या ओळखीचे आहेत. आरोपीने पीडित मुलीला वाघोली आणि खराडी येथे बोलावून घेत एका महिलेच्या घरी घेऊन गेला. त्याठिकाणी तिला शिवागाळ करुन मारहाण केली. तसेच मुलगी अल्पवयीन असल्याचे माहित असताना देखील तिच्यासोबत जबरदस्तीने वारंवार शारीरिक संबंध प्रस्थापित केले.
याबाबत कोणाला काही सांगितले तर तुला आणि तुझ्या आई-वडिलांना जीवे मारण्याची धमकी दिली. दरम्यान, पीडित मुलगी ४ महिन्याची गरोदर राहिली. आरोपीने हा प्रकार लपवण्यासाठी मुलीवर गर्भपात करण्यासाठी जबरदस्ती केल्याचे फिर्यादीत म्हटले आहे. याप्रकरणी चंदननगर पोलिसांनी आरोपीवर पोक्सो कायद्यांतर्गत गुन्हा दाखल केला असून पुढील तपास सहायक पोलीस निरीक्षक खांडेकर करीत आहेत.
