उरुळी कांचन, (पुणे) : उरुळी कांचन जवळील शिंदवणे घाटात वाहनचालकांना शस्त्राचा धाक दाखवुन लुटमार करणाऱ्या पाच जणांच्या टोळीला उरुळी कांचन पोलिसांनी अटक केले आहे. शुक्रवारी (ता. ०२) रात्री सव्वा अकरा वाजण्याच्या सुमारास ही घटना घडली होती.
अनिल हनुमंत जाधव (वय-२०), प्रवीण अनिल हावगोळ (वय-२२), विश्वास दयानंद जाधव (वय-१९), स्वप्निल विनोद देडे (वय -१९, रा. चौघेही, विडी घरकुल पवन नगर, सोलापूर), एकनाथ उर्फ रामेश्वर घोडके (वय २१, रा. निवडुंगे, ता. पाथर्डी जि. अहमदनगर) अशी अटक करण्यात आलेल्या आरोपींची नावे आहेत. याप्रकरणी गणेश बाळासाहेब महाडिक (रा. सध्या सासवड मूळ रा. शिंदवणे, ता. हवेली) यांनी उरुळी कांचन पोलीस ठाण्यात तक्रार दिली आहे.
उरुळी कांचन पोलीस ठाण्याचे वरिष्ठ पोलीस निरीक्षक शंकर पाटील यांनी दिलेल्या माहितीनुसार, शुक्रवारी रात्री सव्वा अकरा वाजण्याच्या सुमारास उरुळी कांचन जवळील शिंदवणे घाटातून गणेश महाडिक हे शिंदवणे परिसराकडे त्यांच्या दुचाकीवरून निघाले होते. यावेळी रेल्वे ब्रिजखाली तीन अनोळखी इसमांनी लाईट दाखवून महाडिक यांना अडविण्याचा प्रयत्न केला. परंतु, महाडिक न थांबता तसेच पुढे निघून गेले.
यावेळी महाडिक यांच्या मोटारसायकलचा वेग हा शिंदवणे घाटातील वळणावर कमी झाला. वेग कमी झाल्यानंतर दोन अनोळखी इसमांनी हाताने मारहाण करण्यास सुरुवात केली व पँन्टच्या खिशातील बाराशे रुपये जबरदस्तीने काढून घेतले. त्याचवेळी घाटातून वाघापूर बाजूने उरुळी कांचनकडे एक ट्रक निघाला होता. या ट्रकचालकाने महाडिक यांना मारहाण करताना पाहिले व ट्रक थांबवली. त्यानंतर सदर पाचही आरोपी त्या ठिकाणावरून पळून गेले. या प्रकरणी उरुळी कांचन पोलीस ठाण्यात महाडिक यांनी दिलेल्या तक्रारीनुसार गुन्हा दाखल करण्यात आला होता.
दरम्यान, सदर घटनेचा तपास उरुळी कांचन पोलीस करीत असताना वरिष्ठ पोलीस निरीक्षक शंकर पाटील यांना या गुन्ह्यातील आरोपी हे उरुळी कांचन परिसरात लपले असल्याची माहिती एका खबऱ्याकडून मिळाली होती. त्यानुसार पोलिसांनी तात्काळ त्या ठिकाणी छापा टाकून तीन आरोपींना ताब्यात घेतले. त्यांच्याकडे अधिक चौकशी केली असता फरार दोन आरोपींनाही पोलिसांनी मोठ्या शिताफीने मुद्देमालांसह ताब्यात घेतले आहे.
सदरची कामगिरी वरिष्ठ पोलीस निरीक्षक शंकर पाटील, उपनिरीक्षक सुधीर पाडुळे, पोलीस हवालदार रणजीत निकम, सोमनाथ सुपेकर, रमेश भोसले, प्रमोद गायकवाड त्यांच्या पथकाने केली आहे. तपास पोलीस उपनिरीक्षक सुधीर पाडुळे करीत आहेत.
