पुणे : बहिणी बद्दल चॅटिंग केल्याबाबत वडिलांना सांगितल्याच्या कारणावरुन ८ ते १० जणांच्या टोळक्याने एका तरुणाला बेदम मारहाण करुन धारदार शस्त्राने वार केल्याची घटना घडली आहे. ही घटना रविवारी ७ जुलै रोजी रात्री पावणे अकरा वाजण्याच्या सुमारास पांडवनगर येथील सार्वजनिक रोडवर घडली. याप्रकरणी चतुश्रृंगी पोलिसांनी गुन्हा दाखल केला आहे.
याबाबत इसाक फिरोज पठाण (वय-१९ रा. पठाण वस्ती, जुनी वडारवाडी, पुणे) याने चतुश्रृंगी पोलीस ठाण्यात फिर्याद दिली आहे. त्यावरून शोएब मेहबुब सय्यद (रा. हेल्थ कॅम्प, पांडवनगर, पुणे), अबु शेख, आयुष साठे (दोघे रा. वीर सावरकर बस स्टॉपमागे, जनवाडी, पुणे) यांच्यासह पाच ते सात जणांवर गुन्हा दाखल केला आहे.
याबाबत पोलिसांनी दिलेल्या माहितीनुसार, आरोपी शोएब याने त्याचा मित्र दक्ष नलावडे याच्यासोबत फिर्यादी इसाक याच्या बहिणीबद्दल चॅटिंग केली होती. याबाबत इसाक याने शोएबच्या वडिलांना सांगितले होते. याचाच राग मनात धरून शोएबने इसाकवर हल्ला केला. दरम्यान, रविवारी रात्री पावणे अकराच्या सुमारास फिर्यादी इसाक आणि त्याचा मित्र पांडवनगर येथील ताशकंद बेकरी समोरील सार्वजनिक रोडवर गप्पा मारत बसले होते.
त्यावेळी आरोपी त्याठिकाणी आले. शोएब याने इसाक याला शिवीगाळ करुन धारदार शस्त्राने वार हातावर केले. घाबरलेल्या इसाकने आरोपींच्या तावडीतून सुटका करुन पळ काढला. मात्र, आरोपींनी त्याचा पाठलाग करुन त्याला रस्त्यात गाठले. अबु शेख याने दगड उचलून इसाक याला मारहाण करुन जखमी केले. पुढील तपास चतुश्रृंगी पोलीस करीत आहेत.
