पुणे : केटरिंगचा काम करणाऱ्या महिलांच्या ग्रुपला रस्ता ओलांडताना भरधाव वेगात जाणाऱ्या एका गाडीने जोरात धडक दिली. यामध्ये पाच महिलांचा मृत्यू झाला तर १३ जण गंभीर जखमी झाले आहेत. हा अपघात सोमवारी (ता.१३) रात्री पावणे अकराच्या सुमारास पुणे-नाशिक महामार्गावर राजगुरुनगर जवळच्या शिरोरी परिसरातील खरपुडी फाट्यावर झाला.
सुनंदा सटवा गजेशी, सुशीला वामन देढे (रा. रामटेकडी शांतीनगर), इंदुबाई कोंडीबा कांबळे (रा. किरकटवाडी, सिंहगड रोड), सायराबाई प्रभु वाघमारे (हडपसर) असे मृत्यू झालेल्या महिलांची नावे आहेत. तर, शोभा राहुल गायकवाड, सारीका देवकर, वैषाली धोत्रे, शोभा शिंदे असे गंभीर जखमी झालेल्या महिलांचे नाव असून त्यांच्यावर रुग्णालयात उपचार सुरु आहेत.
याप्रकरणी शिवानी कैलास माने (रा. सातारा रोड, स्वारगेट) यांनी खेड पोलीस ठाण्यात फिर्याद दिली. त्यानुसार पोलिसांनी अज्ञात वाहनचालकाविरुद्ध गुन्हा दाखल केला आहे.
मिळालेल्या माहिती नुसार, केटरिंगचा काम करणाऱ्या काही महिलांचा ग्रुप खरपुडी येथील मंगल कार्यालयात मंगळवारी (ता. १४) लग्न कार्यक्रमात स्वयंपाक व वाढपी काम करण्यासाठी जात होत्या.यासर्व महिला स्वारगेट येथून पीएमटी बसने शिरोली येथे उतरल्या. त्यानंतर रस्ता ओलांडत असताना, त्यावेळी पुण्याकडून एक पांढऱ्या रंगाची महिंद्रा एक्सयुव्ही किंवा टियुव्ही या मॉडेलच्या कारणे या महिलांना जोरदार धडक दिली.
कारची धडक बसल्यानंतर रात्री अंधारात महिलांचा आरडाओरडा सुरु झाला. रस्त्यावर रस्ताचा सडा पडला होता. अपघातात दोन महिलांचा जागीच मृत्यू झाला तर तीन महिलांचा रुग्णालयात उपचारादरम्यान मृत्यू झाला. तर १३ जण गंभीर जखमी झाले.
जखमींवर चांडोली ग्रामीण रुग्णालय, राजगुरुनगर परिसरातील चार ते पाच खासगी रुग्णालयात उपचारासाठी दाखल करण्यात आले आहे. याप्रकरणी शिवानी कैलास माने (रा. सातारा रोड, स्वारगेट) यांनी खेड पोलीस ठाण्यात फिर्याद दिली. त्यानुसार पोलिसांनी अज्ञात वाहनचालकाविरुद्ध गुन्हा दाखल केला आहे. या घटनेचा पुढील तपास पोलीस करीत आहेत.
