अमिन मुलाणी
सविंदणे : शिरूर तालुक्यातील सविंदणे-कवठे रस्त्यावरील पूर्व नरवडे मळा येथे चार ते पाच अज्ञात चोरट्यांनी घराचा दरवाजा उचकटून आत प्रवेश केला. घरातील वृद्ध दांपत्याला जबर मारहाण करत, पत्नीच्या गळ्यातील सोन्याचे मंगळसूत्र, मोहन माळ, जोडवी, कर्णफुले असा अंदाजे दहा तोळ्यांचा ऐवज लंपास केला. तसेच घरातील सामानाची उलथापालथ करून घरातील तीन हजार रोख रक्कम घेऊन पळून गेले. मंगळवारी (ता. ६) पहाटे अंदाजे १:३० ते २:१५ या दरम्यान ही घटना घडली.
अधिक माहितीनुसार, चोरट्यांनी संभाजी नरवडे यांच्या घराचा दरवाजा उचकटून नरवडे व त्यांच्या पत्नी बबूबाई नरवडे यांना जबर मारहाण केली. या दाम्पत्याच्या घराशेजारी कोणतेही घर नाही. ते दोघेच घरामध्ये राहत होते. मुलगा नोकरीननिमित्त बाहेरगावी वास्तव्यास आहे. या अचानक घडलेल्या घटनेमुळे हे दाम्पत्य भयभीत झाले आहे.
दरम्यान, चोरट्यांनी केलेल्या मारहाणीत संभाजी नानाभाऊ नरवडे (वय ६७) व बबूबाई संभाजी नरवडे (वय ६०) हे गंभीर जखमी झाले असून, गावातील नागरिकांनी त्यांना उपचारासाठी हॉस्पिटलमध्ये दाखल केले आहे. या घटनेमुळे गावातील व परिसरातील नागरिक भयभीत झाले आहेत.
गावात विद्युत रोहित्र, विद्युत मोटारी चोरीचे सत्र सुरूच आहे. आता घरफोड्याही सुरू झाल्या आहेत. पोलीस प्रशासनाने याला वेळीच आवर घालणे गरजेचे आहे.
